Diadomingo anochi, pa mas o menos 11:15 pm riba e caminda di Camacuri, chauffeur di e Kia Sportage color preto A-18809 alcansa un peaton masculino na altura di Aruba Bank. E accidente tabata asina fuerte cu el a fayece na sitio mes. P’e aña aki, esaki ta e di cuater morto.
Vocero suplente di Cuerpo Policial Arubano (KPA), Liliana Rasmijn, a indica cu central di polis a haya yamada riba un accidente basta serio na altura di Aruba Bank, unda auto a alcansa un peaton. Di biaha polis a yega na e sitio y a topa cu un hende homber banda di caminda. E situacion di e peaton tabata mustra hopi critico.
A pidi pa asistencia di ambulance, cual a yega na e sitio, pero e paramediconan no por a haci nada mas p’e victima. Pa 11:45 pm dokter Texier a constata morto di A.J.B. di 54 aña y ta naci na Brasil. Ta kere cu e ta traha aki na Aruba, pero KPA no a topa ainda cu amistad of famia.
Na sitio polis a laga test e chauffeur di e Kia Sportage, kende a termina deteni pa tabata stuur auto bou influencia. E chauffeur tabata na warda di polis pa duna cuenta na subfiscal y duna su declaracion di e accidente.
Rasmijn a sigui splica cu diferente departamento policial a presenta na e sitio pa asina haci e investigacionnan necesario. Incluso hefe di trafico como fiscal a presenta n’e sitio pa asina delibera y mira kico lo haci. A tuma e curpa di A.J.B. den beslag.
Den fin di siman ya caba polis tabata druk cu diferente suceso. Diadomingo den ora di marduga un auto a alcansa un peaton dilanti Lekker Bar, kende su situacion ta critico. Hopi accidente ta tumando luga, p’esey ta pidi pa e automobilistanan baha nan velocidad y mira bon den trafico. Tambe pa si ta bebe pa no stuur, pone celular un banda y pone atencion den trafico. Rasmijn den nomber di Cuerpo Policial a manda palabra di forsa n’e famia di A.J.B.
E Kia Sportage tabata bayendo direccion abou na momento cu a alcansa e peaton. Pero pa un motibo of otro e auto a alcansa e peaton cu consecuencia grave y e persona a fayece n’e sitio.
Cantidad di morto den trafico
Pa loke ta trata morto di trafico, A.J.B ta e di cuater morto. E prome tres mortonan ta hende homber. E prome morto di trafico ta Guiseppe Papagni di 36 aña a tuma luga dia 30 di januari den e bocht cerca di Tamarijn All Inclusive. E di dos morto di trafico ta e hoben Maximilian Hernandez di 20 aña. El a fayece dia 18 di maart den oranan di marduga, cual accidente a tuma luga riba e caminda di Savaneta. Dia 30 di maart Marco Tromp di 80 aña a bira e di cuater morto di trafico.
Esaki a bira e di cuater morto den trafico pa e aña aki. Aña pasa a cera cu nuebe morto total den trafico. Headlines Group, cas editorial di 24ora.com y Trempan, ta manda palabranan di condolencia na famia di e fayecido.
