Partido AVP a tuma nota cu e dos ministernan Oduber di Gabinete Wever-Croes, a anuncia cu lo bay bin un hotel. Esey ta un cos cu pa e partido a sorpresanan sumamente grandi, segun parlamentario Arthur Dowers.
Na prome luga tin minister Dangui Oduber, kende a acusa Otmar Oduber den pasado di ta corupto. El a bisa cu den varios ocasion e tabata tin entendi cu el a haya maleta di rosa, esta maleta yen di placa pa binimento di hotel na pais Aruba, pasobra na Aruba no tin mester di mas camber di hotel.
Awo a bin na compronde cu no solamente nan ta tuma distancia di loke nan a predica tur e dianan aki, esta acusando parlamentario Benny Sevinger cu lo a duna hopi camber di hotel pa traha, pero nan ta dunando na e momento aki, of facilitando un proyecto, cu den concepto di AVP no ta necesario y no lo sigui tampoco si no haci loke nan ta haciendo awor aki.
Nan ta facilitando benta di un tereno di pueblo. Esey ta nifica cu mas of menos 17 miyon lo bay wordo paga pa un tereno. E placa aki lo bay bin for di un persona cu ta sponsor e gobierno di MEP, y parce cu ta sponsor Otmar Oduber tambe y cu e persona aki, lo bay adkiri e tereno aki, e ta bay traha un hotel y lo bay wordo opera pa un cadena conoci.
Awo, segun Dowers, ta puntra nan mes pa ken ta traha e hotel aki. Nan mes a bisa cu no mester di mas hotel ni camber pa pais Aruba. A acusa Otmar Oduber di ta corupto, pasobra el a bin cu mas camber di hotel. Awo e mes a sinta brasa cun’e, djente afo, pa bin cu mas hotel.
Tambe, loke ta sorprende AVP ta, cu Otmar Oduber a bay contra di construccion di un hotel na Bubali. El a bira furioso, ora cu riba un tereno priva e persona a dicidi cu nan kier a construi un hotel. El a bay contra pasobra segun e no mester ni bin hotel mas, y awo ta wak’e sinta na grandi cu personanan cu no sa ken nan ta. E ora ta cuestiona kico tin ey tras.
Awor aki ta na Dangui Oduber tin pa splica si ta maleta of bahul de rosa, pa e cos aki por sigui.
Tambe, na di dos luga, ta cuestiona, unda e estudio di impacto social ta. Unda e estudio di impacto ambiental ta. Kico e ta bay nifica pa nos pais pa loke ta e parti social, e parti laboral, e parti siguridad. Mas hotel, mas hende. Con bo por haci e cos aki trankil y prome minister, Evelyn Wever-Croes, kende tambe den pasado a bay Ministerio Publico pa denuncia e minister aki pa corupcion, ta sinta masha trankil y no ta bisando nada.
Tambe parlamentarionan di partido MEP, kende den pasado a para den koor pa bay contra di tur proyecto di hotel, tur ampliacion di camber di hotel, awo tur ta keto.
Dowers a pidi pa pueblo keda pendiente pasobra cu e reaccionnan cu a haya te awor aki ta duna cu lo bin hopi mas cos afo y ta sigur cu e pueblo no lo bay acepta e cos aki sin mas.
Parti di beach
Ta conoci cu na hotelnan, dilanti di e area, aunke e ta publico, na momento cu traha un hotel, e publico no por yega mas facil manera mester ta. Segun Arthur Dowers, den e area aki, ta e unico area cu a keda cu ta wordo usa pa localnan. Tambe tin e minister actual Oduber, cu bao di su mesun instruccion a kita e derecho di pueblo pa usa e beach, pasobra a otorga e hotel e posibilidad pa por den cierto sentido huur tereno di gobierno pa pone stoel. Y na momento cu pone stoel ningun hende local lo bay sinta mas. Banda di hotelnan, tur ta den man di hotel y awor aki ta duna esaki tambe, ta kita e libertad y derecho di pueblo.
Bushiri hotel a bisa e tempo ey, a cumimnsa keda pa pueblo. Ban spera. Mirando con e hendenan aki ta opera, ora cu nan ta den oposicion ta bisa un cos y ora ta den gobierno ta otro cos. E mesun hendenan cu a acusa pa tuma maleta de rosas, ta sinta awor aki hunto. Dowers ta tene su curason pa mira kico lo bya pasa na Bushiri tambe. Tin mas cos a pasa den e area aki, caminda cu tin hende yega na e minister actual, cu a haya tur sorto di facilidad pa nan por opera den e areanan aki. Lo vigila di cerca pa mira cu ta mesun cos cu lo bay pasa na Bushiri hotel, Dowers a comenta.
