Esnan cu ta maneha Coco Loco Aruba, tin basta preocupacion pa un persecucion cu ta tumando luga. Parlamentario Arthur Dowers a sigui henter e situacion y a mira kico ta pasando.
El a comenta cu tin un situacion cu ta sumamente penoso. Tin cu tene cuenta cu Arubianonan a duna contribucion, traha, na mehoracion di nos producto turistico. Y na luga di wordo sosteni pa gobierno, nan ta wordo persigui. A mira un racha di persecucion desde cu e gobierno aki a sinta y e persecucion aki a sigui.
E parlamentario a compronde di esnan cu ta opera e establecimento aki ta increibel. A mira algun tegels cu a pone eynan pa yega beach, sin cu mester trapa riba piedra, etc., a forsa nan cu mester kita nan. Nan a traha un douche pa baña riba beach, pa e turistanan por ta limpi. Esey a obliga nan pa kit’e. Rond di e edificio tin un parti di beton basha. Nan no a amplia y kita tereno bay cu santo. A uza e facilidad cu tin, cu ta e parti di beton, lanta un pida cos chikito riba dje, pa asina nan por cumpli cu e rekisitonan pa por haya vergunning y bende algun cos cu hende por come riba beach.
E Parlamentario no ta compronde con un minister por hinca den su cabes, cu na luga di por sostene desaroyo di e pais, sostene hendenan pa bay dilanti, ta persigui nan. Por mira cu nan a bay den weekend, pone diferente ambtenaar traha overtime, pa kita cos di hende for di riba beach, siendo cu e personanan aki tin vergunning pa tin nan y un di e poconan cu a paga tambe pa e vergunning aki. Hopi di nan a bay corte, pero wardando e proceso den corte no a paga. Por a mira cu un Arubiano cu ta bringa y cumpli cu belasting, ta wordo persigui den e forma aki.
E parlamentario no ta compronde ki interes e gobierno tin pa persigui un hende cu ta haciendo algo cu ta aumenta e calidad di servicio cu ta brinda na e turistanan crucero y e otronan cu ta bin bishita nos pais.
Algo mas grave ta cu tin mas di e kiosconan aki. Nan a wordo traha pa gobierno mes y ta cuestiona con por ta posibel cu gobierno a traha un facilidad, duna un hende y despues e facilidad no ta cumpli cu e rekisitonan pa haya un vergunning, ta increibel pa e por pasa, pero el a pasa. Tambe, con por ta posibel cu tin otro facilidadnan. Tin cu mira e otro facilidadnan unda cu a amplia tur cos riba beach. Of nan no tin vergunning, pero no ta persigui nan, pasobra ta su hendenan. Tin indicacion cu un di e kiosconan ta bay pa e minister mes antes. Dowers tin indicacion cu minister mes ta bay pa e kiosco, pero ora cu cos a bira cayente, a pas’e pa un amigo.
Mas tristo ta cu e kiosco tin tur cos riba beach buta y nan ta kit’e. Of el a haya vergunning, no tin gelijkheidsbeginsel, of ta persiguiendo un hende so y no esunnan mas cerca dibo, tambe cu e gelijkheidsbeginsel. Tin cu mira kico ta pasando riba e pais aki. Tin di compronde for di informacionnan cu ta gaña huesnan cu hasta hues ta bay na nan fabor. Dowers no tin ningun problema pa mantene ordo y garantisa respet y descencia manera mester tin y pa tur hende mantene na ley, pero si tin cosnan cu no ta rasonabel. Tin cosnan cu no tin ningun sentido cu e gobierno aki ta haciendo. E parlamentario ta sigur cu na momento cu pueblo mira tambe, e ridicules cu e gobierno aki ta haci, ta puntra bo mes si no tin algo miho pa haci. Esaki ta un abuso di poder. Por a mira esaki den otro partinan den nos region. Awor aki tin un gobierno cu ta mescos cu pais bisiña y si pueblo no ta conciente y si no para e hendenan aki, nos lo bay den e mesun direccion cu e otro pais totalitario. Pueblo no lo permiti esaki. Ta pesey tin prensa liber y ta denuncia. Prensa a condena caba internacionalmente e cosnan cu a pasa y tin cu keda haci uzo di prensa pa denuncia loke nan ta haciendo. Ta e unico forma cu por para e abuso cu ta tuma luga, abuso contra hendenan cu no a sostene Otmar Oduber, abuso contra hendenan cu no a sostene su partido, cu no a duna nan sponsor. Esey ta henter e cos. Si a duna sponsor na nan, lo por a keda. Si no a duna, e ora ey tin persecucion. AVP lo ta vigila di cerca pa mira kico ta para cu amigonan di Otmar Oduber y e caminda cu e lo habri pa su mes, lo vigila esaki di cerca y mira si nan tambe tin cu cumpli cu e reglanan cu nan ta pone pa tur otro hende cumpli cun’e.
