FTA y gerencia di Orchid Casino a trata den varios forma den presencia di mediador di gobierno, pa resolve e diferencianan cu tin pa purba di yega na un acuerdo basico, cu lo mester conduci na un contracto colectivo.
Segun Anselmo Pontilius, nan no por a yega na un acuerdo formal riba esaki, ya cu e casino mes ta informa cu nan no ta pasa den nan miho momento, particularmente pa loke ta cliente. Pero cu nan mes disputanan interno entre nan cu e hotel.
E punto aki, a compronde cu nan lo sigui atende internamente, pero hustamente un biaha mas, e ta refleha e parti cu a señala caminda cu por ehempel e hotel tin e licencia, e ta huur su casino na un tercera y cada biaha di nobo, ta ripara cu e trahadonan ta e prome cu ta carga e consecuencia di cualkier problema cu surgi entre e operador y esnan cu tin e licencia.
No mester lubida cu Riu Antillas no tin hopi tempo cu e ta bek den operacion. Hopi biaha nan ta firma contractonan di duracion largo, cinco pa diez aña. E hecho cu nan tin un contracto di corto of largo duracion, esey no mas di afecta e trahadonan.
A resulta por ehempel, ultimo tres pa cuater aña of mas, cu e casino aki ta opera imaginando cu debi na algun condicion cu a wordo poni y ta wordo bisa di parti di Banco Central, por imagina cu e casino ta opera sin cu e tin un cuenta di banco, den un tempo cu nos ta biba cu ta cuestiona con esey ta posibel.
Den e caso di Aura Casino por a mir’e y otronan. Esaki ta e situacionnan cu a recomenda gobierno, minister di labor, pa percura pa trece partidonan mas pronto cu ta posibel na mesa, y preveni cu Aruba ta sigui topa cu e situacion aki den e tempo cu nos ta bibando aden.
E papel di mediador
Den e caso aki ta keda duna recomendacionnan. Uno ta, pa loke ta e operadornan di casino, esnan cu ta haya e licencia di gobierno, di pais Aruba. Minister di husticia ta otorga esaki y mester por pone condicionnan mas estricto riba dje. Esey ta e recomendacion di mediador cu prome cu pone esaki, invita e mundo di casino, e asociacion di casino, na mesa, hunto cu sindicato, percura cu tin palabracionnan concreto. E palabracionnan aki eventualmente adapta, cambia, maneho y/of cambia e leynan mes riba esaki. Contrario na esey, ta bay topa e problema aki atrobe riba corto plazo, mirando cu tin operadornan cu ta opera y cada biaha nan ta topa cu e problema, sea cu no tin suficiente fondo y/of nan ta drenta den conflicto cu esnan cu tin e licencia.
