Tur hende tin derecho pa expresa nan desacuerdo, Anko Koopmans, director di SERLIMAR a reacciona bisando. E ta consciente di e accion pasobra a haya un carta di e sindicato.
El a splica cu e empresa ta den un estado di Suspension di Pago y tin un problema cu likides, cu ta restringi e empresa den su maneho. Nan ta paga basa riba loke nan tin disponibel. A haci e pago di salario, cu ta nan prioridad. No a paga e vakantie-uitkering, pasobra no tabatin mas fondo.
Den oranan di atardi, a mira cu a drenta un suma di placa.
Ya caba siman pasa SERLIMAR tabatin reunion cu Minister di Finanza y e Bewindvoerder, apunta door di Corte, unda a palabra cu ta bay haci pago extra na e empresa di recoge sushi. E suma aki a haya riba nan cuenta y awe ora cu el a bay repasa e cuenta a constata cu el a drenta ayera tardi. Por a preveni e welga of accion aki si tabatin miho comunicacion. Nan di SERLIMAR no tabata sa cu e pago ta na caminda. Si tabata sa esaki, por a informa e trahadonan, y por a haci e transferencia pa e empleadonan. “Tur hende mester compronde cu mester traha hunto, pa e compania por sobrevivi. No por salba e compania cu division. No ta tur hende ta wak den e mesun direccion. Tin cu kier yuda y otronan,” el a bisa.
Tur e diferencia di opinion ta trece cu ne cu e pueblo ta bay haya desconfiansa den e situacion y ta stop di haci pago na SERLIMAR. Un entrada cu e compania mester dje aworaki den e situacion dificil pa por sigui paga e trahadonan. “Nos ta purba di tin un posibilidad di existencia.”
E compania tin te dia 26 di augustus pa proba cu nan tin derecho di existencia. E ta exigi pa tuma esaki na serio. Mester tin un bon comunicacion, entre otro cu asina cu tin placa pa SERLIMAR pa avisa esnan responsabel pa no bini welga, ya cu esaki lo duna nan un mal nomber door cu no ta duna e servicio necesario.
Koopmans a bisa cu no mester bringa otro pero bringa pa e causa di SERLIMAR cu e ta dispuesto pa lucha pa salba e compania.
Den e caso di pago di vakantie-uitkering, Koopmans a bisa cu e placa t’ey pero e mester haya aprobacion di e Bewindvoerder pa haci e pago di vakantie-uitkering.
