Angelino Vrolijk tambe ta un docente cu tabata tey na e reunion hunto cu minister na e dependance di Juliana School na Piedra Plat, den e edificio di Piedra Plat Entertainment Center. El a splica cu e reunion a bay bon. Sinembargo e inkietud cu mayoria di e docentenan tin tey ainda. Si mira e trayectoria desde cu e minister a bin afo, unda cu e ta indica cu no mester sinta cu sindicato y despues e ta bay sinta cu nan toch. Siman pasa a sinta den un reunion na Simar, e minister a expresa cu e docentenan no ta ambtenaar y cu nan no tin ningun derecho. Nan tin cu kita for di trabao pa firma e procedura nobo of arbeidsovereenkomst nobo. Ningun momento, e docentenan no ta wordo envolvi of haya nada pa wak, nada pa lesa. E ta un falta di respet tambe, segun Vrolijk.

A wordo vocifera den varios ocasion cu hopi di e cosnan aki nan ta haya sa via prensa, cosnan cu ta bay rond. Despues nan ta bisa cu ta un redo, pero na final di dia, e ta resulta di ta berdad. Ki dia e minister ta bin cerca nan y awe tabata un situacion asina, unda cu sigur, bao di iniciativa di Juliana y Ceque College. Por a scucha y combersa cu e minister. Por a wak den e ultimo reunionnan aki cu minister, ta cu e tono a cambia.

E siman aki lo bay tin mas reunion. Por mira cu durante e encuentronan e tono ta cambia.

Manera den e reunion di awe, ta bisa cu no ta obliga di tuma retiro. Vrolijk a mustra cu mayoria di docente cu ta traha pa Enseñansa Publico lo keda cu e status aki. Kico ta bay crea mañan. Ta bay crea cu den un scol ta mita di e cuerpo ta traha bao di un stichting y e otro parti ta traha bao di Openbaar? Lo no haya igualdad den veld, ni den salario.

Salario por keda igual, pero e posicion huridico si ta cambia. Eynan ta e punto cardinal cu e minister, te dia di awe no por trece siguransa den e parti aki. E por papia bunita, e por cambia su tono, e por cambia palabra. Awe el a cuminsa sigur cu un disculpa na Juliana, debi na e edificio, door cu nan ta na Entertainment Center. Ta cosnan asina ey. Pero e esencia mes tras di tur esaki ta keda afo. Ta hopi blah blah blah, rond di e tema mes, di pakico mester bay over na un stichting. Bay over na un stichting no ta nifica cu bo ta bay hisa calidad di enseñansa. Pa por hisa un calidad di enseñansa, tin cu bay wak den e curriculum di e docentenan, tin cu wak e eindtermennan, tin cu wak den inspectie unda cu tin cu wordo controla. Tin cu inverti den e cuerponan. Esey tambe ta un punto cu ta trece padilanti.

Angelino Vrolijk mes cu a cumpli 38 aña, a yega su top. E no tin posibilidad di crece. Aki 10 aña e bay den stichting of no, e ta frustra, pasobra no ta un reto mas. Bo no tin un posibilidad pa crece. Eseynan ta e partinan unda cu hopi di e docentenan a vocifera pa hopi tempo y te dia di awe no ta scuchando e grito aki. Pa hinca e docentenan zomaar den un stichting, e flie eynan no ta bay subi. Sigur sigur, manera cu e minister a present’e, e no tin ni dragvlag. Sigur ni den Parlamento ni cerca e docentenan. Eynan ta caminda cu tin cu scucha e docentenan sigur y no trece cosnan den media of live riba Facebook, unda cu nan ta papia riba e docentenan. E falta hopi pa convence e docentenan. Vrolijk no ta kere cu e deadline pa 1 di Januari, 2019, unda cu e stichting mester ta na vigor, no lo sosode tampoco.

 

Y si e sigui awo

Si e minister bin cu e fundacion, en principio, e docentenan ta traha bao di enseñansa publico, pero ta keda cu e status di ambtenaar. E pregunta lo bay ta, e directornan sigur lo keda ambtenaar, pasobra nan tampoco no lo kier pa cambia nan posicion. E ora eynan, e hefe directo lo keda minister y no e stichting. Aunke cu e stichting ta beheer e scolnan si mira den practica, e dunado di trabao ta keda minister. Esey no ta bay cambia.

 

Plan di gobernacion

Un di e prome tononan cu el a bisa ta cu e tabata un plan di gobernacion di RED di 2005. Despues el a bisa cu no, ta parti di e plan di gobernacion di coalicion. Den partido of en todo caso loke ta plan di coalicion, esaki no ta para den dje. Ta papia si di calidad, ta papia di good governance. Bo por pone diferente otro cos. Ta un otro punto cu a wordo treci awe. Pakico bay over den un stichting, si por bin cu un tipo di raad van bestuur, pa loke ta enseñansa, unda cu por invita gremionan sindical, por ehempel SEPPA, SIMAR, cu ta e sindicato di maestronan y hunto cu e representante di Gobierno, representante di docentenan, traha riba e calidad di enseñansa. Hincando e docentenan bao di un bachi di un stichting, no ta bay hisa e calidad di enseñansa. E docentenan ta traha di curason. Nan ta traha dia aden, dia afo, cu hoben y ta duna nan no unicamente cariño, pero duna loke nan mester den bida, pa mañan nan ta miho cu e docentenan mes. E politiconan mes a siña for di un docente, pasobra nan trayectoria di politica no a cay for di shelo, sino a sigui nan trayectoria den un scol basico te un scol avansa, y ta haci’e cu amor. Pero no trata e docentenan asina aki, Vrolijk a finalisa.