Durante siman di 15 te 19 di augustus ultimo, e ekipo di Aruba encarga cu landspakket a ricibi bishita di e asina yama Tijdelijke Werkorganisatie di Hulanda (TWO-NED). Durante e bishita aki, cu regularmente ta tuma luga cada cuartal, ta evalua progreso di tur tema di
landspakket y a traha riba e di cuater ‘Agenda di Ehecucion’ pa aña 2022. Durante e bishita a para kedo tambe na algun tema clave, incluso forma di traha, reto cu ta experiencia durante ehecucion y punto di antencion.
E siman a cuminsa cu reunion pa trata tema ‘H’ di landspakket cu ta referi na reforsamento di estado di derecho. Asina a trata topiconan manera ley relaciona cu proteccion di informacion, proyecto di vigilancia di frontera y ahustacion di fondo di criminalidad. A trata tema ‘A2’ unda a para keto na e progreso haci pa locual ta estadistica di Aruba y reforsamento di esaki unda cu recientemente minister di Asuntonan Economico a publica e rapport di implementacion di NSS.
Adicionalmente a para keto na e maneho completo di culumna financiero di pais Aruba unda a trata e asina yama ‘Roadmap’ cu ta duna indicacion di accion concreto cu a tuma y lo ta tumando luga conduciendo na finansa publico duradero. Un otro tema cu tin hopi interes p’e
ta preparacionnan pa locual ta trayecto ‘E1’ y ‘E4’ cu ta trata reforma di mercado laboral como tambe reforma di e sistema di siguridad social.
Den cuadro di reforma cu ta tumando luga den sector economico a papia riba e trabounan pa locual ta ‘Aruba Fair Trade Authority’ cu bou di
liderasgo di departamento di asuntonan Economico ya ta encaminando su etapa di implementacion. Durante e dianan cu a sigui a trata extensamente e tema di reforma di aparato publico como tambe punto di antencion critico den cuadro di esaki.
Di parti di e ekipo local a enfatisa e importancia di mantene y reforsa calidad di aparato gubernamental den cuadro di rerforma. Otro aspecto critico cu a trata durante e bishita di trabou ta e capacidad legislativo di pais Aruba. Unda cu localmente a menciona cu varios reforma lo e.o. rekeri ahusto di ley local. Pa cu esaki a menciona cu mester reforsa y tene cuenta cu e capacidad legisaltivo di pais Aruba. Otro temanan cu tambe a bin na vigor durante e bishita tabata reforma fiscal, enseñansa, salubridad y digitalisacion.
E bishita di TWO-NED a termina den forma ameno unda cu a haci palabracionnan fiho den direccion di e di cuater agenda di ehecucion di e
trayecto di landspakket.
