Alicia Brown tabata traha na Divi Resort y ta preocupa p’e situacion cu e ta pasando aden. El a gana su caso contra su ex dunado di trabou, despues di a sufri un accidente na pia di trabou. Dia 20 december 2018 el a haya su sentencia, di cual na januari 2019 Brown a papia cu su abogado. E secretaria a informa cu nan lo tuma contacto cu ne, pero desde januari 2019 no a papia y no por haya contacto cu nan.
Alicia Brown a papia cu Hernandez algun biaha, a manda carta, puntrando si e por tuma e caso over. E no ta haya contesta y despues a manda carta pa Figaroa puntrando cu desde dia el a gana e caso, kico a haci p’e. El a haya un fecha for di e abogado, pero e secretaria a yam’e despues informando cu e cita a cancela.
Segun Brown, e no sa ki mas pa haci. El a papia cu Hubert Dirksz di sindicato F.T.A., cu a bis’e cu e sindicato lo cubri e gastonan mirando cu e tabata miembro di F.T.A.. E sindicalista a papia cu abogado di FTA, bisando cu e tin di bay busca papel di abogado liber, na Sociale Zaken. Fin di aña el a bay dos otro abogado, kendenan ta purba haya e file for di su abogado pero no a haya nada. E kier mira e abogado, kende no kier mir’e, ni ta contesta su yamadanan. Su bista y oido ta bayendo atras y e ta den un situacion fastioso.
E accidente cu el a haya na trabou a sosode dia 4 october 2011 na momento cu e tabata crusa caya di Divi cu un golf cart. Un homber a bin dal den e golf cart, kende kiermen cu Brown no a mir’e. Na e momento ey un recherche a yega bisando cu nan a mira tur cos. El a bay hospital, pero desde e dia ey Brown tabata mas AO door di e sla cu e por a traha mes. El a acerca recurso humano pidiendo carta pa SVb, pero no a haya esaki. Su ultimo salario tabata na februari 2013 ricibiendo e noticia di Divi cu e ta cay bou di SVb y no di nan. Di otro banda SVb a informa cu e ta cay bou di Divi, pues a mand’e di cashi pa muraya. Door di e accidente Brown no por traha pasobra su presion a bay halto, tin presion di wowo y a daña 7 disc.
Dia 18 december 2018 e sentencia a cay, unda el a ricibi e papelnan 20 december 2018. Segun Brown, e kier pa abogado Figaroa dun’e su file p’asina e por bay otro abogado. E tabatin afspraak cu abogado na maart, pero esaki a keda cancela door di Coronavirus. Door di tin vision limita y tur cos tin cu bay online, e no por wak.
E kier keda cla cu su caso y ta canando e camindanan, a bay Corte pero tur cos mester bay online y no sa ki pa haci. El a gana su caso, pero ta canando un caminda di crus pa por haya e placa cu e mester haya di Divi Resort.
Reaccion di abogado Hose Figaroa
Aunke e no por bay den detaye di e caso, el a sigura cu e documentonan di e cliente ta na su bufete pa por busca. Berdad e señora a gana e prome caso pero mester bay un otro caso pa por determina e suma cu e hotel mester pag’e.
