Un biaha mas e persona aki ta envolvi den incidente di trafico. Polis a detene chauffeur sospecha di ta bou influencia, na Cumana.
Aproximadamente 2:45 pm polis a presenta pa un accidente cu a tuma luga entre un Nissan Fuga y un Toyota (pickup) riba caminda di Cumana direccion Playa.
Chauffeur di e Nissan, na e crusada, tabata wardando turno pa sali y a tuma nota cu e pickup saliendo di e rotonde lo tabata tin su señal poni pa bira na su man drechi. E Nissan a subi caminda pero lamentablemente e pickup a bin dal den dje. A resulta cu e pickup no tabata tin intencion di bira, mas bien a sigi core pero cu e señal ainda poni.
Despues di tuma tur datos na sitio, polis a tuma nota cu e persona aki tabata duna indicacion di ta bou influencia. A pidi transport mesora na sitio. A hiba e detenido warda. Tin di menciona cu e persona a informa di a bebe un par di cerbes.
Segun por a compronde, e persona aki no ta prome biaha ta hay’e envolvi den accidente di trafico bou influencia. Daño material ta minimo.
