E asociacion di turismo di nos isla, AHATA, ta masha contento cu e proposicion di ley di Gobierno, relaciona cu prohibicion pa uza productonan di plastic manera “straw”, “disposable cups” y caha di cuminda “styrofoam”.
AHATA ta aplaudi y apoya e esfuerso di Gobierno pa haci nos isla mas sostenibel y pa proteha nos medio ambiente.
Mester menciona cu hotelnan di AHATA ya caba ta den proceso pa stop uzo di e productonan. Prome cu Gobierno a lansa e proposicion di ley aki, varios hotel miembro di AHATA a stop uzo di e productonan completamente y e demas hotelnan tin plannan pa elimina e productonan prome cu e ley drenta na vigor. Por confirma cu pa fin di October 2018, tur hotel di AHATA lo no uza “plastic straws” y pa fin di aña lo stop di uza e demas productonan manera cupnan di “plastic disposable” y e cahanan y cups di “styrofoam”.
AHATA ta cla pa sigui sostene mas di e tipo di leynan asina den cuadro di proteha medio ambiente y ta spera cu tin bon ehecucion di e regulacionnan aki.
Hotelnan miembro di AHATA ta Aruba Marriott Resort, Barcelo Aruba, Boardwalk Hotel Aruba, Brickell Bay Beach Club, Bucuti & Tara Beach Resort, Divi Aruba All-Inclusive Beach Resort, Divi Aruba Phoenix Beach Resort, Divi Dutch Village and Divi Village Golf, Hyatt Regency Aruba Resort, La Cabana Beach Resort, Manchebo Beach Resort, Marriott’s Aruba Ocean Club, Marriott’s Aruba Surf Club, The Mill Resort & Suites, Renaissance Aruba Resort, The Ritz-Carlton Aruba, RIU Palace, RIU Palace Antillas, Talk of the Town Hotel, Tamarijn All-Inclusive Beach Resort, y Tropicana Aruba Resort.
A funda Aruba Hotel and Tourism Association (AHATA) na 1965 pa representa e sector di turismo di Aruba. AHATA ta representa na mes momento 100 miembro cu ta companianan dunando servicio den turismo y ta emplea un gran parti di empleadonan riba nos isla. Su miembresia ta varia for di hotelnan, timeshare, operadornan di tours y watersports, y mas companianan grandi y chikito den e sector. E rol primordial di AHATA ta pa influencia exito sostenibel pa e industria turistico di Aruba.
