Luis Oduber cu ta CEO di WEB Aruba NV a splica cu actualmente ta consumiendo rond di 3500 bari pa dia na WEB. Bo por hedge full esey, bo por hedge 50% di dje. Tin diferente manera cu bo por haci’e. Na final bo por cumpli cu bo expectativanan.

Tin un budget cu a wordo aproba pa e accionistanan y a base di e budget eynan, a hinca cierto prijs, caminda cu tin cu purba di retene prijs di fuel pa por cumpli cu e tarifanan, cual ta loke e pueblo consumidor ta interesa den dje.

Mester aclarea tambe cu e meta di WEB semper lo ta pa busca un miho tarifa posibel y esey Gobierno nobo a menciona claramente. Tin pa bay wak ki posibilidad tin cu lo por ofrece un reduccion y alabes tambe kier wak cu e ta duradero. No kier bay introduci un reduccion cu ta bay dura dos pa tres luna y despues ta haya cu ta aument’e bek, pasobra semper esey ta fastioso. Den pasado a haci un encuesta na diferente instancia y e deseo mas grandi tabata pa stabilidad di tarifa. Y esey ta purba di mantene. Na momento cu por ofrece un reduccion, lo mester ta algo duradero pa un periodo largo y no pa un reduccion ficticio cu despues di algun luna mester hisa e tarifa bek.

Facilidad pa hedge

Ultimo biaha e problema ta pasobra a hedge mucho tempo y a bin cu su consecuencianan basta pisa. Hasta e situacion di WEB no a keda bon. Segun Oduber, pa bo hedge, ta mesun cos cu seguro, manera un seguro di auto. Bo por scoge pa no sigura bo auto. E ora bo no ta saca ningun placa, pero bo ta core cu e riesgo cu na momento cu dal bo auto kibra of causa daño, bo tin cu saca placa pa drecha bo auto y e contrapartido.

Hedge ta loke e ta, ta un seguro bo ta cumpra, cu na momento cu e prijs subi, bo ta proteha di dje. Mas bo kier proteh’e, mas e prijs ta bay subi. Oduber a splica cu awor aki a hinca den nan presupuesto un suma cu por uza pa cumpra e seguro eynan, pa asina por trata na mantene e tarifa mas stabil posibel. Tin un suma cu por cumpra of negosha pa purba mantene e tarifanan mas miho y manera mester ta semper, e meta ta keda na final pa si por ofrece un reduccion por haci esey.

Reduccion

Oduber a comenta cu awor aki nan ta bay wak e resultadonan di e ultimo añanan y weita termino largo. No kier core duna un reduccion y despues mester aument’e bek. Tin inversionnan grandi padilanti. Ta premirando por ehempel e introduccion di gas natural, cu lo bay tin beneficionan grandi pa Aruba. A base di e inversionnan cu tin cu hinca, tin cu bay wak cuanto placa mester tin di reserva pasobra na momento cu ta inverti, WEB mester hinca di su parti. WEB no ta bay banco y wordo financia 100%. Te ainda esey no tabata posibel. Esey ta un caminda cu tin cu cana wak si nan por wordo financia 100%. Esey lo nifica cu e reservanan cu WEB ta poniendo pa bay haci inversion eynan, lo por bin liber cu lo por transferi esey den posibel reduccion of no.

Bon noticia

WEB ta moviendo pa algun tempo caba, hunto cu Utilities. Esey ta pa por logra bin cu gas natural via barco cu ta drenta via Barcadera. Tambe na ultimo a wordo acerca pa PDVSA Gas cu tambe a bin ofrece gas. Pero no a yega nunca na papia di prijs mes cu PDVSA of cu Citgo Gas. Awo cu aña a habri por pone mas enfasis riba importacion di gas via Barcadera y pa por yega na un contract faborabel pa naturalmente tarifanan na prome luga y tambe pa medio ambiente.