Tur e dianan aki, Kustwacht ta den un accion relampago cu casi no ta tende di dje, pero masha exitoso mes. Luis Kirindongo, hefe di operacion na Kustwacht Aruba, a splica cu diasabra anochi, radar kamer a mira un boto cu tabata biniendo riba radar, pazuid di Rodgers Beach.
Eynan durante un persecusion relampago a bin na intercepta e boto. E boto aki tabata tin 20 persona abordo, cual tabata purbando na e momentonan ey pa drenta Aruba den un forma ilegal. E personanan a wordo treci na kazerne na Savaneta, caminda cu a cuminsa pa procesanan y esnan cu a haci nan mes culpabel den e caso aki, di traficacion ilegal di hende, pa asina ey nan por responsabilisa nan mes dilanti di autorisa pa esaki.
Kico ta e proceso
Kirindongo a splica cu den un caso asina aki, bo ta hayabo cu mensenhandel/ mensensmokkel. E capitan y tambe e tripulacion ta wordo persigui penalmente pa nan actonan. Esnan cu ta ilegal aborto ta wordo procesa, di manera cu nan ta wordo deporta bek pa nan pais.
Kustwacht tin su maneranan pa detecta kende ta e capitan. Esey ta un di e trabaonan cu e miembronan di e servicio aki ta entrena pa asina nan ta basta delanta ora cu nan yega. A base di esey Kustwacht hopi biaha ta algun paso dilanti pa detecta esey.
Accion riba lama
Por corda cu algun luna pasa, a haya hasta despues hendenan cu a yega y cu a wordo intercepta cu granadanan di man. Kirindongo a splica cu berdad ora cu haci un intercepcion, mester pensa cu por topa cu tur cos riba lama. Por topa cu arma, por topa cu droga, por topa cu persona ilegal. E ta un trabao caminda cu e tin su riesgonan rond di dje. Pero si por bisa cu personal di kustwacht ta bon entrena pa nan sa cu nan tin cu haci nan proceduranan pa aborda e botonan. Ora cu nan yega, un di e prome prioridadnan, pa por move mas rapido posibel, sigura boto aki pa e ta sigur y e personanan cu ta riba dje. E prome focus ta, siguridad pa nan mes y tambe siguridad pa e otronan cu ta abordo di e boto, pasobra e botonan tin biaha ta bin cu cosnan cu ta insigur riba dje pa nan mes. A base di esey ta sigui haci e resto di e trabaonan.
Botonan safe
Kirindongo a comenta cu ta trata botonan cu falta hopi regla di siguridad maritimo. Hopi biaha ta botonan cu no tin luz, botonan cu no tin un bildge pump pa chica awa ora cu esaki yena cu awa. Hopi biaha ta trata botonan chikito cu hopi hende abordo, cu si biaha ora cos bay robes, hopi hende su bida ta na peliger. Bo ta haya cu tin hende sinta mey mey di e poronnan di gasolin y tur ta exponi cu si algo mester bay robes, cu esey mester pega na candela, por haya cu un desaster. Tambe bo ta haya cu botonan cu ta move sin ningun zwemvest riba dje. Tin diferente cos di siguridad cu ta mira cu nan ta falta cun’e ora cu nan yega Aruba. Den pasado a yega di mira caminda cu lamentablemente tabata cana pici cadaver saca for di awa cu a yega nos costanan. Botonan ta sali y e nan no ta nabegabel, nan no por resisti lama y hendenan ta tuma e riesgo toch pa crusa lama cun’e pa por yega Aruba. Esey tin biaha ta di lamenta e consecuencianan cu tin mara na dje.
E boto
E boto ta uno chikito, e no por a carga asina tanto hende. Segun Kirindongo, si mira den e boto aki, por puntra bo mes, ta con tur hende por a tuma e riesgo di haci e biahe aki y tambe riba dje tabata tin manera un 6 pa 7 container di gasolin. Ta cosnan cu bo ta bisa cu ta risico cu hendenan ta tuma concientemente. Nan tin nan motibonan pa kico ta tuma e riesgonan aki. Tin biaha bo tin cu paga caro. Den pasado lamentablemente tin a paga cu nan bida pa cierto tripnan asina.
E hendenan mes
E hendenan cu ta bin riba e boto ta paga pa nan trip. Tambe e hecho caminda cu nan ta splica cu e situacion cu nan ta den dje na Venezuela, nan no por carg’e. Nan kier busca otro caminda pa tin un miho bida. Un bida caminda cu economicamente nan por draai mas trankil. A base di esey nan ta tuma e riesgo di haci cierto biahenan asina aki. Esey ta un di e factornan cu hopi biaha ta motiva nan pa tuma tipo di tripnan asina.
Placa
E pago por bay den diferente manera. Segun Kirindongo, por ta nan tin conoci na Aruba, caminda cu por supplynan e placa. Por ta ora nan yega, di un forma of otro nan por traha bek cun’e. Tin diferente forma cu nan por haci’e. Si no tin e placa pa haci’e, por wak si por fi’e cerca un amigo of conoci pa por logra haci e trip. Por ta tambe nan a traha, spaar nan placa. E hecho ta y e ta keda cu tin cierto sumanan mara pa haci e tripnan y nan no ta den estado pa haci esaki. Ultimo tempo e tripnan bal 200 pa 300 dollar y ta haci e tripnan aki cu un cantidad di hende.
