Si tur cos a sigui normal, diabierna mainta mester a tuma luga un walkout na Calloway. Sinembargo na ultimo momento, cu intermediacion di Mediador, tur cos a calma.
Hose Figaroa, vice presidente di sindicato FTA, cu ta representa e trahadonan, tabata presente pa e reunion na Calloway. “E reunion, yama door di Mediador di Gobierno (Anselmo Pontilius), no a bay malo. E reunion ta yama inicialmente pa tene un accion pasobra gerencia a manda un carta bisando cu lo no paga e bonus di fin aña na e trahadonan.”
FTA tin un CAO firma cu e compania den nomber di e trahadonan. Den e CAO ta inclui e pago di bonus na fin di aña. Esaki, manera Mediador di Gobierno Pontilius a splica den otro entrevista, no ta algo cu por cambia unilateralmente.
Figaroa a splica cu e sindicato, despues di a tende di e carta, a haci algun sugerencia na e compania. Sinembargo nan a keda para’riba cu no ta paga nada. P’esey a programa un accion pa diabierna mainta.
Tabata e empresa mes cu diahuebs den oranan di merdia a acerca Mediador di Gobierno pa intermedia y mantene paz laboral. Pa respet pa Mediador, e sindicato a dicidi di wanta cu nan accion y trata di soluciona e diferencia di opinion na mesa. Na final di e prome reunion, toch ta mira cu tin un avance chikito. E encuentro lo sigui dialuna ora cu FTA ta spera cu por yega na un acuerdo.
E sindicato ta realisa cu e situacion no ta bon. Nan ta consciente di esaki pasobra nan ta representa trahadonan den mas cu 50 empresa. Y tambe ta un berdad cu mayoria compania no tin e forsa financiero pa pague completo y ta di compronde, pa cual ta logra yega na un acuerdo. Sinembargo loke si no ta aceptabel ta ora bisa cu no ta paga nada. FTA ta dispuesto pa coopera y tin tur comprension, pero mester yega na un areglo.
