Diahuebs atardi a drenta informe di un accidente cu a tuma lugar na e birada di Calabas bayendo pa Kudawecha na altura di “Aruba Cunucu Village”. A papia di hende levemente herida. Na yegada di Polis a bin compronde cu un Ford Edge preto tabata bin di Kudawecha bayendo pa Calabas, ora e chauffeur a sinti algo na su pia.
Esaki a distrai e chauffeur y ora di bira wak abou mientras e tabata drentando e lorada, e no a ripara cu e a cuminsa core mucho na su direcion robes. Aki e auto a dal den banda di un Hyundai Tucson cu tabata riba e caminda contrario. Door di e impacto e chauffeur di e Hyundai a sinti su enkel y ambulance a bin na e sitio.
E no tabata asina serio y despues di un check up den ambulance e victima por a baha y atende cu e roadservice. Polis a tuma datos di ambos chauffeur envolvi pa asina nan tambe por traha nan rapport. Ambos auto a keda cu daño material.
