Tabata despues di 4’or di diahuebs atardi cu a drenta informe cu nan a horta den un UTV na Bushiribana y cu e sospechosonan ta den vecendario ainda. Mesora un patruya di Polis a wordo manda pa e sitio pa asina nan atende cu e asunto aki. Na yegada a papia cu un tourguide cu a splica Polis cu e tabata guiando y bahando un grupo di turista na e swimming pool natural na Boca Mahos, ora un grupito di algun persona a subi y despues baha atrobe.
Segun e tourguide e a keda no mas cu 8 minuut cu e turistanan y despues a subi back ariba. E ora un pareha turista a haya falta di placa y e tourguide mes a haya falta di su celular. Mesora e a pensa riba e personanan cu a subi mientras cu nan tabata bayendo abou y cu nan a regresa back despues.
Aunke e no a mira cu ta nan a coy e plaka y su cel, tog a sospecha cu ta nan mes tabata envolvi. Pesey e a dicidi di yama Polis y a splica Polis tur cos cu a pasa. Despues di a scucha e version di e tourguide, Polis tambe a baha bay na e Pool Natural cu a forma desde cu un pida di Boca Mahos a cay aden basta aña pasa.
Polis a acerca e sospechosonan y a listra tur nan pertenencianan. Despues cu Polis no a haya algo, a pidi e grupo pa subi pa habri nan auto pa asina Polis por busca den nan auto tambe. Polis a busca den tur dos auto di e grupito pero no a logra di haya e items nan cu supuestamente a wordo horta.
Aki Polis no por a haci mucho mas, pasobra no tin prueba cu enberdad e grupito ta esun culpable di a horta den e UTV di e tourguide y su turistanan. Polis a bandona e sitio, y e grupito a keda atras pasobra no por a encontra nan cu nan tin algo di haber cu e ladronicia.
