Diahuebs den oranan di merdia, pasa di 1’or, a drenta informacion cu na altura di Plaza Betico tabata tin un accidente cu hende herida.
Rapidamente polis a yega na e sitio y dilanti di Plaza Betico, no a topa ningun accidente. Bayendo parti patras, a topa cu un accidente cu tres auto envolvi riba e cruzada di Rumbastraat cu Stadionweg.
A resulta cu ta trata di un pickup, un SUV y un Sedan, tabata e autonan envolvi den e desgracia y tabata tin dos herido leve. Presencia di ambulance tabata necesario. Polis di trafico a haci nan investigacion y asina haya e declaracion di cada un di esnan cu tabata chauffeur di e autonan envolvi.
Un di e autonan ta un V-wagen, esta e SUV. Un mucha cu tabata levemente herida a wordo atendi pa paramediconan di ambulance.
Autonan a keda hopi kibra y cu takelwagen nan mester a wordo movi for di e sitio.
E impacto tabata basta fuerte manera cu por a tuma nota riba e ilustracionnan adhunto.