Diasabra, den careda di 2:30 pm, polis a bay n’e crusada peligroso di Sero Pita pa un accidente cu basta daño material.
Tabata trata aki di un auto di un compania di pest control, biniendo di ariba, a subi e crusada sin duna preferencia na un Mitsubishi Lancer colo shinishi cu tabata biniendo fo’i nort, cu e consecuencia ya conoci.
Chauffeur di e auto di e compania a laga sa cu e no a mira ningun auto na momento cu el a subi e crusada, aunke cu manera el a subi caminda, el a scucha lastro di brake, pa despues un auto bira dal den su banda.
E impacto tabata asina fuerte cu e Mitsubishi a ranca parti patras di e auto di compania, mientras cu e front di e Mitsubishi tabata completamente kibra y tambe e auto a haya daño na su banda robes.
Pa colmo a start un candela den e Mitsubishi. E chauffeur den su susto a hay’e ta paga e candela aki.
E chauffeur di e Mitsubishi tabata keha di dolor di lomba, sinembargo e no kier a bay cu ambulance p’e haya tratamento medico.
Mientras cu polis tabata haciendo su trabao y colecta dato di tur esunnan envolvi, tension a bay halto un rato debi cu a bisa e chauffeur di e Mitsubishi cu e mester a baha su velocidad na momento cu el a yega e crusada.
E chauffeur a rabia y a indica cu e tabata riba caminda di preferencia y cu loke a bise ta manera cos cu e tabatin e culpa, siendo cu e auto a pasa su dilanti.
Polis a purba di splica motibo pakico a bise asina, pero no a logra calma e chauffeur.
Finalmente e chauffeur di e Mitsubishi a bandona e sitio na pia rabia. Mientras tanto su tata a yega n’e sitio pa sigui percura p’e resto di e detayenan cu autoridad y roadservice.
Daño material ta considerabel.
