Diahuebs un tiki promer cu 7’or di anochi a tuma luga un accidente na Santa Cruz banda di “Richelle Beauty Vision” situa na Santa Cruz, unda antes “Lopez Sand and Stones NV” tabata situa.
Segun informe tabatin persona herida den e accidente aki. Polisnan a yega rapidamente na e sitio y a topa cu 2 auto cu basta daño material, un mucha cu a sufri lesion na cabes y e chauffeur di e otro auto cu herida na su cabes. Un testigo cu tabata core tras di e Toyota Corolla Station wagen cu a causa e accidente a conta cu e chauffeur tabata coriendo direccion Piedra Plat y diripiente a subi e acera, perde control, subi bek riba caminda y a dal den un Kia Optima cu tabata bayendo direccion Santa Cruz.
E impacto tabata basta fuerte y tire di e Kia a kibra y los full for di e auto, mientras su tire patras a dobla full ora e golpi a pusha e Kia contra e acera na otro banda.
Mirando cu tabatin un mucha sinta den e Kia cu a haya sla na cabes y cu e tabata manera keto, a solicita ambulance mesora y tambe un ambulance extra pa e chauffeur di e Toyota Corolla cu a dal su cabes contra e windshield di su auto y tabata sangra na su cabes.
Ora e prome ambulance a yega, e paramediconan a hinca e mucha den ambulance, despues di nan check up a dicidi di hib’e pa Hospital pa asina por observe mas miho. E paramediconan di e di dos ambulance a hinca e chauffeur di e Toyota Corolla den nan vehiculo. Despues di a haci nan check up, a baha e chauffeur atrobe y pas’e pa Polis unda Polis a detene despues pa ta sospechoso di core bou influencia y ta e causante di e accidente.
Transport wagen a hiba e detenido pa warda di Polis unda e lo bay dilanti e Sub-Fiscal. Takelwagen a kita ambos auto for di caminda, ya cu ningun di dos no tabata apto mas pa core.
