Respaldo hunto cu Arubaanse Bond van werknemers in Verplegende Instellingen (ABV) a yega na un acuerdo pa e Contracto colectivo di trabou (CAO) y nan a firma esaki. Pa por a finalisa e acuerdo di CAO, ambos banda a yega na palabracion cu ta husto p’e trahadonan.
Hendrikus van Galen, director di Respaldo, a indica cu e sindicato ABV ta profesional y nan curason ta na bon luga. Den e combersacion esey tabata duidelijk. Tambe ABV ta compronde con Respaldo ta, incluso ta compronde con tur cos ta conecta cu otro. E bienestar di empleado ta conecta cu bienestar di Respaldo, mientras Respaldo ta conecta cu bienestar di cliente.
Nan a sinta papia cu otro pa asina mira kico por haci p’e CAO y pa tur hende. El a indica cu inflatiecorectie ta bira cierto suma y esey ta significa cu esunnan tin salario mas abou ta haya un porcentahe mas ariba den nan sueldo. Esunnan cu tin mas mester duna cu tin menos.
Ta importante pa haci cambio riba un CAO, specialmente despues dje temporada di scarsedad. Ainda tin scarsedad, temporada di Covid, problema di lista di espera, e problema di verblijfsafdeling. Awo por cambia un tiki un biaha mas e cosnan.
Gina Maduro, presidente di ABV, a splica cu despues di tur turbulencia cu Respaldo a pasa, cual no tabata facil, diferente situacion di cual un departamento mester a cera. A pesar di tur e situacion, asina mes nan por a yega na e palabracionnan unda tin mehoracion pa e condicionnan laboral, primario y secundario p’e trahadonan, e miembronan labora na Respaldo.
Un di e puntonan cu ABV a pusha p’e tabata e parti di prima di pensioen. Den e ultimo protocol, a pone cu esaki ta hisa. Pero door di e ultimo inkorting di 5.5% cu mester tabata entrega, esaki tabata gevries. E aña aki na october, e contract di pensioen ta vence, ta pone cu nan mester a negosha uno nobo. Esey ta pone cu pusha pa firma e CAO mas lihe posibel, prome cu e periodo yega 10%. Aki ta unda e trahadonan, esta e werkgevers premie ta bira 10% y e werknemers premie ta 5%.
