E cambionan cu mester tuma luga den e Codigo Penal nobo, cuminsando na prome april, tabata recientemente den parlamento y a causa hopi consternacion. Esaki ta momento cu a pasa e ultimo cambionan den Codigo Penal nobo, pero cu un nota di cambio chikito cu a trece hopi reaccion negativo for di sector legal.
Orde van Advocaten Aruba (OvAA) mesora cu a tuma nota di e cambio chikito aki a manda un carta di protesta. Sinembargo no a ni haci caso di nan apelacion.
E cambio chikito ta algo cu a spera pa hopi aña riba dje pasobra di e forma aki Aruba tambe ta cumpli cu norma internacional. Aunke hopi ta kere cu e ta un cos chikito y mester wak tur e otro parti bon cu tin den e ley nobo, pa e abogadonan e ta diferente. Loke ta hopi cla ta cu “ley den buki no ta mescos cu ley den practica,” abogado mr. Vito Carlo a comenta diabierna ultimo den e programa Enfoke di Nelson Speed Andrade y Patrick Paskel.
E abogado hunto cu su colega mr. Demis Illis a enfatisa cu nan no ta papia di forma politico, pero ta percura pa derecho humano di nan cliente. “Mi a mira hende homber grandi yora. Ami ni mi enemigo mi ta desea pa e t’ey den,” Carlo a agrega.
Illes a splica entre otro cu e situacion nobo mester a trece un cambio unda cu, segun standardnan internacional, ta limita e cantidad di tempo cu un persona ta pasa cera den Warda di Polis, cu su acomodacionnan no ta apto pa pasa hopi tempo eyden. Pio esnan di Aruba, segun diferente rapport internacional ta señala.
E periodo di detencion di un persona na ward’i polis ta considera e parti mas pisa di e tempo di detencion. Segun e ley, cu ta valido te cu 31 di maart awo, ta bisa cu despues di dies (10) dia no por ta cera mas na un ward’i polis. Den e sistema nobo, a cambia esaki pa un maximo di seis dia (4 dia menos). Den e situacion actual, Carlo a splica, despues di dies dia abogado por pone presion cerca hues comisario pa manda e detenido KIA of lag’e bay liber. Hues comisario na su turno ta pone presion e ora riba Ministerio Publico.
Den e nota di cambio a kita e obligacion cu despues di seis (6) mester bay KIA. Y ta laga e posibilidad habri cu esey por sosode ‘te despues di 20 dia. “Bo ta kita e poder (herment) di un abogado pa por entrega e peticion na hues comisario cu na su turno lo pone presion riba Ministerio Publico pa manda e sospechoso KIA. E Nota di Cambio tabata un cos chikito, ya cu tur otro cos a keda mescos,” Carlo a splica. Y a agrega cu e ley normal, sin e Nota di Cambio, lo a haci cu despues di seis dia por pone presion. Pero e realidad awo ta, e presion aki por pone te despues di 20 dia.
