Algun momento pasa a keda confirma e fayecimento di abogado mr. Chris Lejuez. Esaki a sosode na su residencia y rondona pa su sernan stima. Lejuez a sufri pa un periodo masha corto despues di a keda diagnostica cu cancer den estado avansa.
Chris Frans Karel Joseph Lejuez ta bay na edad di 74 aña. Na bida e tabata un di seis ruman, casa cu Laraine Lejuez Pappers; matrimonio for di cual a nace tres yiu y welo pa ocho nieto. Ademas di un cabes ehemplar di famia, Lejuez a hiba un carera hopi exitoso como abogado.
El a practica ley penal, pero tambe civil y a dirigi un bufete renombra ubica net otro banda di caminda di edificio di Corte na Playa. Den transcurso di e ultimo aña, el a desmantela e bufete pa asina gradualmente prepara pa su periodo di merecido hubilacion.
Mr. Lejuez tabata un bon amigo di 24ora.com y Trempan, semper dispuesto pa coopera cu un entrevista, informacion, pero tambe conseho y critica constructivo si tabata necesario. Nos ta extende nos mas sincero palabra di condolencia y forsa na henter famia Lejuez cu e perdida invaluabel aki. Cu Chris Sosega na paz.
