For di prome cu 3’or dfi atardi diabierna, abogado David Kock tabata para na e kiosconan pa wak si DIP a yega pa asina bin exigi of tuma e yabinan. Dos dia largo aparentemente nan a pasa reparti carta, cu nan lo bin. Nan a bin te hasta compaña pa polis. El a splica cu nan a reuni cu mayoria di e personanan cu tin nan negoshi na Welcome Plaza. A pasa den e carta cu diahuebs nan a haya for di DIP. A manda un carta di parti di cada un di nan pa Gobierno, splicando pakico e pensamento ta fout cu por yega cu e contracto lo ta nulo, cu por yega saca hende for di dje. Den e relacion aki cu tin contractonan di huur firma valido entre e personanan aki y pais Aruba, si pais Aruba kier anula, nulifica contractonan, pidi pa e hendenan sali, mescos cu cualkier verhuur, nan mester cana e camindanan legal pa wak si nan ta obtene e permiso pa saca e personanan aki y si nan obtene e permiso, e personanan mester sali y si no haya esaki, e ora no lo ta e caso. Pero pa bin na forsa pa saca e hendenan, no ta na su luga, segun e abogado.

Mas hende

Tin varios otro abogado cu ta atende cu otro clientenan tambe cu tin di haber cu e asunto aki. Por a tuma nota cu nan tin papelnan cu ta data di hopi tempo caba cu esaki ta bezig, prome cu e luganan aki a wordo traha caba. Segun abogado Kock, no tur cliente tin e mesun posicion. Ta un grupo di cliente, cada caso riba su mes. Pero manera cu por a mira den liñanan grandi, e hendenan aki tin varios tempo den e localidadnan aki bendiendo, cu a haci nan peticion, cu no ta data di ayera tampoco. Mester a warda un proceso hopi largo.

Gobierno a traha e kiosconan cu e meta pa e tipo di hendenan bin haci nan negoshi. No ta un idea cu a sosode di anochi pa dia. No tin nada straño cu esaki. Pa cada espacio chikito, si calcula bon, ta un bon balente placa pa verkante meter nan ta pagando. No ta un regalo. Ta un grupo di comerciante cu ta trahando duro pa tin un bida.

Kico mas por sosode

A purba di trankilisa e clientenan. Tin comerciante cu tabata hopi preocupa y altera. A bisa nan cu gobierno por tuma cierto paso. Pero esey no nifica cu loke gobiern oexigi ta ley of aplicabel. A bisanan pa keda trankil. Cualkier paso cu gobierno kier tuma, nan lo sa di reacciona debidamente riba esey. Pero no ta asina cu nan ta bin cu polis, dal luga cera, pone hende riba caya. Tin e derecho di estado. Tur ciudadano di nos estado, di nos pais, tin e mesun derechonan. Ta djis personanan, mescos cu si nan tabata huur den un mall tambe di un persona priva, esey ta nan situacion aki. Nan tin un contracto y e contracto mester wordo respeta. Si gobierno kier, nan tin cu cana e caminda corecto.

Cumplimento

Como parti di e contracto ta pa tin tienda gestock y pa ta bendiendo y pagando huur. E huur ta wordo paga, cual no ta barata tampoco.

Carta pa corte

Diahuebs tabata tin un caso cu a manda carta pa corte unda hues a tuma decision mesora. Den e caso aki, ta warda un rato pasobra no ta mira contrario na e situacion di diahuebs, unda cu instancianan di gobierno a yega y kibra e luga y bay cun’e. Tabata tin un motibo mas urgente cu esun aki. Pesey a bin den e caso aki pa monitorea,kico tabata pasando, pa wak kico ta e necesidad. No ta kere cu Gobierno, pa loke ta trata e situacion aki, cu ta diferente na esun di e diahuebs, lo bay tuma cualkier accion asina, pero toch kier a observa wak kico ta pasa y tambe pa e clientenan ta un tiki mas trankil.

Na ordo

E abogado a bin pa mustra sosten na e clientenan, pa nan ta un tiki mas trankil y pa observa, wak si ta bay tin pasonan cu ta bay wordo tuma, pa e ora sa kico lo por ta e posibilidadnan cu por bay haci pa por asisti e cliente.