E lucha di Jerry Staring no a caba. Ainda tin un sentencia cu no a wordo respeta. Segun abogado Kock, minister a ontzeg e toegang.
El a haya un prohibicion pa aparece na pia di trabao y riba terenonan di gobierno. Den derecho di ambtenaar, cada biaha cu tin un decision ta bringa e decision eynan. A bringa e decision eynan y hues a bisa cu e suspension pa por drenta den e edificio di gobierno, esey ta wordo suspendi. Cu e toegangsontzegging bari for di mesa, ta logico cu en principio cu e persona ta bin bek y haci su trabao. Pesey no ta compronde e remarca cu a bisa cu hues no a bisa cu e tin cu bin bek na su trabao. Hues no ta bisa esey. E no tabata ni al caso durante di e procedura. El a haya un toegangsontzegging, no a papia di suspension. E reaccion di parti di gobierno tabata e ora pa bin cu un decision nobo, un otro decision, bisando awo cu ta bay dun’e un trabao diferente. Alegando cu hues no a bisa nada riba dje. Esaki ta un decision nobo cu sr. Staring tampoco no tabata di acuerdo cun’e. E tabata tin su reaccion, door cu hues a mand’e trabao bek y nan no kier’e na trabao, a opta pa scoge e instrumento aki. Ta un uzo no hustifica di un bevoegdheid cu un minister tin. Contra esey e ora tambe a cuminsa un proceso. Sr. Staring a bisa cu e no kier acepta esey. E ora e trabao ta cu si un cliente bisa cu e no ta di acuerdo cu e decision, ta bringa e decision ey. Den ambtenarenrecht contra cada decision, bo tin cu bay bringa separadamente. E ta forsa sr. Staring cada biaha pa bay corte. Sr. Staring tin cu carga awor aki ainda tur e gastonan aki. Despues tin cu wak con e por verhal riba pais Aruba. E ta forsa sr. Staring cada biaha pa cuminsa un procedura atrobe cu ta tuma tempo y ta costoso p’e. E no kier acepta e decision aki cu ta infunda y contra esey un djis lo tin pa trata e caso ey atrobe.
Pone un fin
Abogado Kock a splica cu no ta keda mucho opcion pa gobierno. E no por papia den nomber di e minister. Pero e ora ey no por bisa cu hues no a bisa ta cua funcion locual ta wordo bisa despues di e prome decision. Si hues a bisa cu e tin cu ta bek na trabao y den e caso cu ta bay trata awor aki, ta pidi pa e ta den su funcion y si hues otorg’e esey, pasobra ta keda na hues pa otorga of no. Pero si hues otorga e peticion, no ta resta otro cu sr. Staring mester ta den su funcion. Ta spera cu si esey sosode, si e veredicto ey ta positivo pa sr. Staring, cu esey e asunto sr. Staring trahando den su funcion a caba. Ta premira cu lo bay tin mas problema despues, pero ta depende di gobierno. Cada bes, ta reacciona den nomber di e cliente. No ta e cliente ta tumando un sorto di paso. E ta wordo confronta cu un decision si nan tum’e, e ora e cliente tin cu dicidi cu e bring’e si of no. Y si e bisa si, e ora ta haci’e.
Acercamento
Kock a splica a pidi pa gobierno coregi. Esnan cu ta haciendo esaki, e abogado ta kere cu no ta un bon desaroyo. Un hende cu ta guia un departamento di gobierno, e no por tin tur hende contento. No por tin tur trahado contento. Por ta hasta por bisa caminda cu tur hende ta contento, e trabao no ta bon haci. Ora cu bo tin cu pone regla, percura pa tin disciplina, lo bay tin hende cu no ta contento. Si un grupo di hende cu no ta contento door di nan protesta, e decision ta bira cu e director mester bay, no ta un desaroyo positivo of un desaroyo di aplaudi. Al contrario. Si esey ta e base caminda cu decisionnan ta wordo tuma contra directornan, ta haya cu directornan ta cuminsa haya miedo pa tuma un decision. Si tuma un decision semper tin un of mas trahado cu por ta no ta contento. Ta bay protesta, y despues minister ta manda e director ey cas. Ta spera cu e desaroyo ey no sigui pasobra ta wak’e ultimamente na varios departamento. Semper ta e director mester guia e empresanan. Naturalmente semper bo tin cu controla kico nan ta haci. De facto e no por bira cu ta e ambtenaar ta guia e departamento. E mester ta e director, vooral no si ta un grupo chikito dentro di un departamento, segun abogado David Kock.
