Abogado mr. Doris Canwood ta encarga cu e defensa di Maria (Leoncita) Arends den e caso penal yama “Avestruz”. Un caso den cual Arends tin tres acusacion contra dje: Malversacion; falsificacion di documento y soborno.
E abogado ta insisti cu no por proba ningun di e acusacionnan aki, Principalmente pasobra bendemento di tereno erfpacht no ta castigabel. E ta un procedura civil cu fiscal a mescla pa yega na un procedura penal. Ta trata aki di actonan comercial cu Ministerio Publico kier mira como algo castigabel.
Asina el a splica cu Ministerio Publico ta mescla e persona di Arends cu un entidad huridico di cual e tabata doño, pa bisa cu tin actonan ilegal a tuma luga. Si e tabata accionista den dos compania y despues a bende su accionnan den e companianan aki. “Esaki e por a haci y no ta un echo castigabel,” e abogado a bisa.Y a agrega cu ni si a paga un suma grandi pa e accionnan di NV-nan cu tabata practicamente bashi, e no ta un echo castigabel. Na e momento ey el a duna ehempel di e caso di Mar Azul cu a pasa den un situacion similar y cu Gobierno a bay Corte pa kita e tereno for di nan pero a perde e caso.
Pa loke ta e terenonan, el a bisa cu fiscal a trata di haci un caso penal di un structura riba terenonan cu ta uza pa hopi aña caba. Den esaki el a duna e ehempel di Mar Azul, proyecto di fania Harms na waf cu a pasa den hopi problema ora cu a bende e compania cu tabatin e tereno aki. E ta corda cu ta a causa di e caso aki cu a pone un condicion extra den e condicionnan pa tereno erfpacht. Esaki ta bisa cu mester pidi aprobacion di minister pa traspasa accionnan den un NV cu tin erfpacht riba un tereno comercial. Pero nunca a hinca e condicion aki den e optievoorwaarden.
No por condena Leonita Arends pa un acto civil, e traspaso di sharenan di un compañía, den un caso penal pa cual a pidi pa declar’e liber.
