Cu pensioen pero keto bay den mente. E prome luna di aña 2023 a habri yena di felicitacion, reencuentro, bon deseo y hopi colega di bishita cerca nan ex-colega polis como sorpresa riba nan fecha natal. Esaki ta locual e fundacion nobo di amigonan polis, Fundacion Balora Polisnan Pensiona, encarga cu diferente actividad ta haci. Den caravana ta yega hunto na cas di nan ex-coleganan y demostra cu un gesto y dedicatorio cu ainda, mescos cu semper, nan ta aprecia tur nan aña di servicio, nan amistad y ta bin celebra hunto cu nan un rato pa canta happy birthday y dal un brindis chikito.
Den luna di januari a pasa na diferente cas di ex-colega y cada un a haya un tremendo sorpesa ora cu patruya a cana yega bou zonido di sirena pa asina anuncia cu bishita a yega. E alegria y emocion sigur ta aprecia den cara di cada un y sigur ta aprecia e presencia di cada colega cu ta tuma un rato asina pa yega nan cas y pasa un rato ameno recordando e bon tempo cu nan a pasa trahando hunto.
Tin di bisa cu januari tabata basta druk, ta diferente colega pensiona a haya bishita y cada un mesun special cu e otro. Dia 8 di Januari, Fundacion Balora Polisnan Pensiona, tabatin e honor pa por a celebra cumpleaños di Hamid Abdul, hunto cu su famia. El a traha como un di su ultimo funcionnan den Central di Polis y como tal tabata dirigi e operacion di e cuerpo durante ocho ora largo.
Dia 9 di Januari, hunto cu demas colega, nan a pasa bishita Naldi Tromp riba su fecha natal. Den e ambiente familiar a canta happy birthday y desea lo miho pa su persona. Naldi Tromp a traha gran parti di su carera como polis den e seccion forensico. Den su ultimo añanan e tabata un di e hefenan di Warda di Polis Oranjestad.
Ta sigui pa dia 16 di Januari caminda sorpresa Eric Lake riba su fecha natal. Hunto cu famia y demas colega a yega hunto y desea su persona hopi aña mas di bida. Eric Lake a traha pa gran parti di su carera policial na Jeugd en Zeden Politie. El a comberti den un berdadero experto riba e tereno aki.
Siguiente fecha tabata dia 20 di Januari, miembro di fundacion pensiona hunto cu algun colega, tabatin e placer di por a celebra e cumpleaños di Carlos Hodge, hunto cu su persona y famia. E ultimo aki a fungi como recherche durante mayoria di su añanan. Su ultimo trabou tabata como hefe di recherche di Oranjestad.
Diamars 24 di Januari 2023, a bin hunto cu algun colega y ex alumno nan di Cecil Bronswinkel, a pasa di sorpresa riba su hacimento di aña. Hunto a canta y desea Bronswinkel lo miho riba su dia, el a keda masha contento cu e bishita inespera. El a baha cu pensioen hopi aña pasa. E tambe a traha hopi aña na recherche y inmigracion.
Dia 31 di januari a jega di sorpresa na cas di Chinto Curiel pa dun’e pabien riba su fecha natal. Hunto a canta y desea Chinto Curiel hopi aña mas di bida. El a traha gran parti di su carera policial na Scol pa Polis, unda el a educa centenares di hoben cu a bira polis durante e ultimo decadanan.
Dia 2 di Februari 2023, durante ora nan di merdia a yega hunto cu algun colega, di sorpresa na cas di Chomai Werleman, pa duna su persona pabien riba su fecha natal. Chomai a traha ultimo como hefe di polisnan di frontera na aeropuerto. E ta un bon conocedo di nos leynan di migracion.
Dia 2 di Februari 2023, memey di e celebracion familiar, a yega hunto cu algun colega y sorprende Karel “Chandi” Jeandor. Den union familiar a canta y desea Karel hopi aña mas di bida y salud. El a traha gran parti di su carera como recherche y den su ultimo funcionnan, el a dirigi e departamentonan di recherche di Oranjestad. Mayoria caso grandi di e ultimo decadanan, a pasa den su mannan.
E fundacion
Un grupo di polis a forma Fundacion Balorando Polis Pensionado pa honra esunnan cu ta of ta bay bira pensionado. E fundacion ta 100% independiente di Cuerpo Policial di Aruba y ta un non-profit foundation.
Emiliano Baarh, presidente Fundacion Balorando Polis Pensionado, a splica den su casi trinta aña di servicio, el a mira hopi di su coleganan cu awe ta pensionado y tin un aprecio pa nan. El a haya e idea di forma un fundacion pa duna y mustra e aprecio p’e grupo ey.
E fundacion ta consisti pa Emiliano Baarh como presidente, Anushka Harms como tesorero, Ludy-June Wix como secretario, Roberto Brown, Pedro de Verona Kock, Annette Patterson, Jamal Courtar, Zulaica Mitchell y Beverly Akins ta miembro di directiva. E miembronan cu ta forma parti ta haci esaki den nan tempo liber den forma boluntario. Nan meta principal ta pa reconoce e polis cu a baha cu pensioen siendo polis pa reconoce nan ora di haci aña of ofrece un atencion den caso si bira malo.
Homenahe na bida
Ta intencion pa sigui demostra aprecio na e polisnan pensiona, siendo na bida. Despues cu fayece no ta bale la pena mas pa mustra aprecio. Door di haci un bishita cortico y entrega un regalo simbolico ta un muestra chikito di cuanto ta balora nan y ta stima nan. Hopi biaha e grupo tin e tendencia di sinti nan mes lubida. Pero di e forma aki ta dedica atencion na e grupo specifico aki.
