Mi ta duna sr de Meza un waarschuwing, dos waarschuwing, tres waarschuwing. Mi ta pidi Cuerpo Especial saca sr de Meza afo,” esaki ta loke Presidente di Parlamento Ady Thijsen a bisa e Parlamentario di fraccion berde ora cu el a bay reclama e tempo cu Hendrik Tevreden tin papiando.
Parlamento a cuminsa awe mainta cu e reunion riba e tema di Integridad cu Prome Minister Evelyn Wever Croes y Minister di Husticia Andin Bikker, contestando pregunta di miembronan di Parlamento. Mike de Meza, di e fraccion di AVP, dado a expresa su malcontento pa e desbalance den e tempo cu cada miembro ta haya pa papia. “Presidente di Parlamento constantemente ta stop tur orado, di oposicion, ora cu nan yega 5 minuut. Pero ora Parlamentarionan di MEP ta hunga politica populista, e no ta limita nan na 5 of 6 minuut. Mi a bisa e Presidente cu esaki no ta corecto.”
Pafo di Parlamento de Meza a expresa su disgusto pa e violacion di reglamento di ordo, ora cu no a permiti’e e punto di ordo cu el a pidi y a sak’e afo. “E ta ridiculo, e no ta un gran cos, pero e ta bisa bo si con partidario y e circo di payasada cu tin den Parlamento. E ta ridiculo loke a pasa. Mi a keda decepciona cu e Presidente di Parlamento. Cada rato ta sinti e tendencia cu e no ta obhetivo. E ta Presidente pa TUR Parlamentario. Mester sali na vanguardia di leynan.”
E kier a recorda tambe cu Polis no por saca un Parlamentario for di Parlamento. Esey ta ora cu ta viola reglanan, locual no a sosode. “Pa respet mi a sali di Parlamento.”
De Meza a bisa cu pa loke ta e tema di Integridad mes, por bisa e tabata un payasada. El a menciona cu Prome Minister ta duna oficina di tata tur trabou cu ta cay bou dje, ta nombra primo y su yiunan. “Con nan por papia di integridad. Un payasada e cos aki ta.”