Polis di Bario falta personal, pero no ta solamente den e departamento aki. P’esaki Cuerpo Policial Aruba (KPA) ta trahando pa mira kico tur nan mester y con pa hacie.
Ramon Arnhem, altocomisario di Cuerpo Policial Aruba, a confirma cu nan falta personal. Pero e cuido di bario ta nan prioridad. No ta asina cu den 1-2-3 y yega haya hopi hende nobo, haya hopi colega.
P’esey ta sumamente importante pa nan scucha bon n’e hendenan y asina KPA por priorisa den e parti kico nan tin di haci.
Un otro problema cu nan tin den e departamento aki ta dienst auto. E altocomisario a indica pa loke ta e parti di problema y facilidad cu nan falta, ta trahando riba esakinan. Ta haci esey door di mira precies kico mester, pero tambe kico por haci. Segun Arnhem, nan ta mirando kico tur por haci. Pero loke e altocomisario kier ta pa tin e recursonan adecua pa asina e coleganan por haci nan trabou bon.
POLIS DI BARIO
Polis di Bario of Barioregisseur ta un servicio brinda na comunidad. Ciudadano por acerca nan pa papia riba problema y preocupacion den e bario. A cuminsa na drecha e calidad di servicio y infrastructura di e oficinanan di Polis di Bario. E proceso pa cuminsa cu un “facelift” completo di e postnan, incluyendo e materialnan pa trabou, tabata un iniciativa di ex-minister di Husticia, Arthur Dowers, y ta algo cu tabata bon ricibi.
Rol di Polis di Bario ta pa trece Cuerpo Policial mas cerca di nos comunidad, pa nan ta mas habri y tin mas confiansa den polis. Ta importante pa nos comunidad ta consciente cu polis ta accesibel y t’ey pa scucha nan, y esaki ta logra pa medio di Polis di Bario, entre otro. E introduccion dje oranan fiho di oficina, o sea e “spreekuren” ta parti di e maneho aki.
Tambe Polis di Bario lo cuminsa ocupa su mes cu cierto proyecto y accionnan den bario.
