Tumando nota cu e compania local Daltra N.V. ta un stakeholder den e blueprint cu Ministerio di Naturalesa ta maneha pa procesamento nobo di desperdicio y cu dicho compania algun luna atras a pasa den un candela grandi pa cual mester a evacua parcialmente e bicindario di Parkietenbos, a puntra e Minister Ursell Arends su pensamento.
E mandatario a indica cu e no a wak un rapport ainda di kico a ocasiona e candela ni cua ta e consecuencia ambiental cu esaki tabatin, pero cu a inclui e preocupacion di e habitantenan ora cu a delinea e standard den cual e companianan mester tene nan mes na dje.
Arends no ta kere cu pa un eror mester bay castiga un compania, mas ainda ora cu esaki ta haciendo inversion pa minimalisa cu un sucedido manera ta e candela lamentabel, tin chens di ripiti. “E compania a bin ta haci e tarea pa hopi aña caba. Kizas pa un descuido of otro motivo, esaki a sosode. Ami no a ricibi un rapport ainda,” asina e titular di naturalesa a comenta diahuebs mainta.
