Apesar di tur facilidad crea, un biaha mas por a constata fila di cliente para na Departamento di Impuesto pa cumpli cu pago di belasting di auto, cu ta vence dia prome di februari.
Directora di Departamento di Impuesto (DIMP) Luenne Gomez-Pieters a papia di e problema cu tin na e oficina nobo di DIMP na San Nicolas, cual ta un asunto cu SETAR mester regla. Tanto riba e prome dia como awe trempan, a haya problema cu e conexion di internet cu no tabata stabiel. Sinembargo hopi lihe SETAR a drecha e situacion pa e clientenan por sigui cumpli cu nan debernan fiscal.
A constata tambe fila di persona, no solamente na e oficina central di DIMP na Camacuri, pero e directora a haya informacion cu e situacion ta mescos na e diferente MFA-nan unda nan tin oficina. En realidad, el a bisa, e ta contento cu e ciudadanonan ta consciente cu nan mester cumpli cu nan deber, den e caso aki, pa pago di belasting di vehiculo di motor.
Sinembargo tur esaki ta innecesario, segun e directora. E ta un impuesto cu tur hende cu tin un vehiculo di motor ta na altura cu mester paga belasting tur aña. DIMP a habri e posibilidad for di november pa paga 50 florin pa luna, pa ora cu e momento yega, a cumpli completo cu e pago di e prome aña.
Pero tambe tin e posibilidad pa pago online cu ta uno hopi sigur. Hopi cliente ta haci uzo di esaki. Si a sigui e procedura aki, no tin e filanan aki. Ademas, ta innecesario pa haya boet si a ofrece diferente otro posibilidad pa por cumpli cu e pago y na tempo.
Mirando cu tin fila, DIMP a pone tent pafo y ta pone awa pa e clientenan, pero tambe ta controla cu ta evita cu ta para mucho pega riba otro.
