Informacion confirma for di Cocolishi ta cu pronto Ronny Wix lo bay desplega un funcion nobo na Washington. Conseho di ministro a aproba e siman cu a pasa pa Ronny Wix tuma e funcion di Joselin Croes. E temporada di Joselin Croes como minister plenipotenciario na Washington a pasa.
E mes kier keda y a pidi pa keda mas tempo, pero a alarga su temporada solamente pa busca su remplasante. Gobierno a acerca Ronny Wix cu ta un abogado cu un trayectoria largo y exitoso. El a bay di acuerdo y si tur cos ta bon comienso di otro aña Joselin Croes lo mester bolbe pa asina Ronny Wix tuma over. Nos fuente a bisa cu ya caba Ronny Wix a bay Washington unda el a haya un recorido.
E trabou aki ta uno di hopi mas peso compara cu un trabou di e minister plenipotenciario na Hulanda. Esun di Hulanda ta un funcion di nombracion politico. Esun na Washington mester carga aprobacion di gobierno di Hulanda y ta un proceso prome e keda cla. Ora nos redaccion a haya e informacion di fuentenan den Cocolishi, a yama mr. Ronny Wix cu a confirma pero no kier a bay den detaye. Lo keda pendiente pa asina mira con e desaroyo lo sigui pa e funcion di Aruba na Washington.
