Siman pasa, durante un ceremonia cortico, a honra un figura bon conoci na Aruba den ramo di exploracion y conocedo di nos minanan di oro, fosfaat y nos cuebanan. E artista Gilbert Senchi a crea e obra di arte di brons den su tayer na Colombia y a yam’e “E explorado”.
El a laga su amigo abogado mr. Lincoln “Dello” Gomez efectua e ceremonia oficial na Aruba como cu frontera entre Aruba y Colombia ta cera. Mario Perez a ricibi e homenage aki den presencia di su casa, cu ta hopi orguyoso di dje. Mario Perez ta haci e trabou boluntario aki pa algun decada y no a hacie solamente su hobby sino a profesionalisa den dje tambe.
Ora bin investigadonan profesional di afo pa evalua nos cuebanan, ta cerca Mario Perez nan ta bay. Pa evita cu e leyenda y storianan di mina ta bay perdi, Mario Perez a hasta documenta e informacionnan aki den un publicacion. Dello Gomez, siendo tambe presidente di Fundacion Museo Arubano a aplaudi e iniciativa y a encurasha Perez pa sigui publica mas storia di nos mina- y cuebanan.
E ultimo trabou di Gilbert Senchi a bira e Homenage na e explorado Mario Perez. E artista ta convenci cu e contribucion importante di Mario Perez den explora y documenta e minanan di oro y cuebanan di Aruba a hacie e “Golden Boy” di Aruba. A crea un estatua cu e mesun color natural di oro pa representa e contribucion di Mario Perez na nos patrimonio den e era di oro.
Pa loke ta e estatua mes, a dun’e e nomber oficial “The Explorer (AP # 1)” diseña y crea pa Gilbert Senchi. Su dimension ta midi 29X24X16cm, ta traha cu material brons y ta pisa 5 kilo. Ta e aña aki, 2020, cu a diseña y traha e estatua aki.
Mario Perez a acepta e homenage aki den presencia di su casa, hunto cu Dello Gomez, mientras cu Gilbert Senchi a sigui e ceremonia via e programa di computer skype. Claro e tambe tabatin solamente palabra di elogio pa “The Golden Boy” y a pidie pa e sigui explora y specialmente sigui documenta e historia di mina- y cuebanan di Aruba.
