Awe durante dia Cuerpo di Duana, durante un control abordo di e avion AmeriJet, a “canta bingo” ora e cacho anti droga a reacciona riba carga di e compania UPS. Ta trata di algun tubo, cu tabata yena di droga, bayendo rumbo pa Hong Kong. Mesora a verifica cu e persona cu a manda e carga aki ta Angelina Solognier, pa cual sea e ta deteni caba of lo deten’e pronto.
Pa straño cu por zona, ainda tin hende ta kere cu ta facil pa manda droga of cualkier producto ilegal via carga, asina sin mas. No ta tene cuenta cu tin varios punto di control, durante henter e trayecto di e carga, tanto na e agencia mes, na aeropuerto, den e avion di carga, na e aeropuerto di transito, te ora cu porfin e carga yega su destinacion final. Na cada punto atrobe tin control riguroso, pa evita cu carga ilegal ta sea sali of drenta otro pais.
Mester menciona cu aki na Aruba no ta un excepcion. Tanto e compania mes ta haci algun control, aunke cu Duaneronan tin miho ekipo y autoridad pa haci mas control ainda. Esey ta precisamente loke a sosode awe tambe, unda den colaboracion cu UPS, a repasa tur e carganan prome cu e avion lanta vuelo pa Merca. Ey lo mester cambia di avion pa e carga sigui su destinacion largo pa Hong Kong.
Cuerpo di Duana a pasa e droga pa e unidad di crimennan organisa di Cuerpo Policial Aruba pa sigui cu e investigacion, bou supervision di Ministerio Publico. Fiscal ta dicidi cu e pruebanan riba mesa ta suficiente pa detene e sospechoso di a manda e carga aki. E lo tin cu duna cuenta di e contenido den e carga, si e tabata sa cu e ta mandando droga pa Hong Kong of si e lo por sa mas ta con e droga a drenta den su carga.
