Archivo Nacional Arubano a wordo acerca pa sr. Dufi Kock, kende a indica cu e tin dos conoci, cu a haya un obheto cu ta un submarino y kier a haci algo cu nan por entreg’e na e departamento.
Prome cu esey, George Davelaar di Corsou, mester arm’e pa asina ey haci’e mas presentabel pa e departamento. Segun Raymond Hernandez, director di ANA, despues di cinco luna cu Davelaar ta bezig, a hay’e entrega na Archivo, cual a tuma luga diasabra 15 di februari.
Pa Archivo ta improtante pa tin un obheto asina, pasobra no solamente ta wak’e riba un potret, of bo ta lesa over di dje, pero bo tin’e di cerca pa wak’e den un forma 3D cu bo ta pasa rond di dje y wak tur e detayenan di e submarino.
E replica di dje, ta esun cu 78 aña pasa a ataca Aruba riba dia 16 di februari, durante Segunda Guera Mundial. Despues di su trabao na Aruba, el a wordo gesink door di Mericanonan. E ta algo sigur cu ta mara na nos historia.
Segun Hernandez importante tambe ta si mira e gesto di sr. Wolters, cu a haci entrega di diferente atributonan cu pa Archivo ta un muestra cu kier pa nos Arubianonan kier tambe kico nan tin na cas, sea ta documento, potret, obheto, cu nan ta bisa cu nan mes no tin nada di haci mas cu nan, pero cu por bisa cu ta importante pa sea un biblioteca, un archivo of un museo tin’e y pa nan por haci e gesto ey, pa entreg’e pa asina ey nos comunidad keda cera conoci cu cosnan cu por ta hopi tempo no ta mira mas.
Esey ta spera cu ta e mensahe cu bay cu no mester tin miedo pa trece documentacion por ehempel na Archivo Nacional, pasobra e ta enrikece nos historia.
E conocido historiador, Dufy Kock ta conta cu e submarino cu a presenta ta esun di mas importante. E mester a bombardea e refineria mas grandi di mundo. Su meta tabata pa bombardea Lago y tur e tankinan rond di Lago.
E impacto di guera a cuminsa dia 16 di februari 1942, pa 1’or y 31 di marduga, ora cu a manda e prome torpedo riba SS Pedernales, cu a coy candela y casi perde speransa pero no a sink. Ey a perde ocho tripulante for di 36.
Despues e submarino ta punta riba SS Oranjestad, e ta dal Oranjestad cu torpedo y den mey ora e ta sink. Ey ta muri 15 tripulante for di 22. Den dos minuut, 23 hende a perde nan bida. Ta e calamidad di mas grandi den historia di Aruba.
E submarino aki, despues cu el a laga Martinique, el a sigui bay y 350 miya p’ariba di Barbados, e capitan ta bisa su tripulantenan pa hisa e submarino pa nan bay tuma un zonnebad prome cu e yega Alemania.
E zonnebad aki a causa cu tur a fayece, pasobra un capitan di un avion Mericano a sali for di e base di Trinidad haciendo patruya, a mira nan. Despues el a bay halto sconde den nubia y bin abao sink e submarino caminda tur hende a muri.
Despues e ta bira rond y a mira cinco hende den awa. A tira salbabida. A dun’e señal pa baha, pero mirando cu lama tabata bruto y falta di fuel a bay base bek. A manda un barco US Barnes, pa haya e hendenan. Nunca mas a haya esakinan. Den un solo palabra, tur hende a muri.
Dufi Kock ta sigui conta cu for di 1997 unda cu el a skirbi su prome buki, el a investiga historia di Aruba, historia di Lago, Segunda Guera Mundial. El a bira su hopi. El a skirbi tres buki riba guera. Un di SS Valera, esun riba torpedo di Eagle cu a causa morto di cuater marinier. Tambe el a skirbi SS Antillian p’abao di Malmok. Historia a bira Dufi su hobby. For di 1997 cu el a skirbi su prome buki, el a haya un smaak pa sigui cu historia y laga esaki bon documenta pa e futuro generacion.
Stan Dabian tabata tey presente na ANA, kende tabata invitado di Amigonan di Archivo y tambe di un amigo den ultimo tempo, Dufi Kock, pa asina bin presencia e entrega di e submarino y tambe e coleccion di loke ta di e tempo di Segunda Guera Mundial.
Esaki tabata un momento importante pa haya informacion pa loke ta historia di Aruba. Ta di aplaudi cu Archivo Nacional a haci esaki den mas biaha. Den diferente ocasion nan tin exposicion den e sala di exposicion y cu ta habri pa publico. Tin cu bisa cu ohala e publico di Aruba, hubentud, bin bishita Archivo Nacional mas biaha pa haya e informacion tocante e historia di Aruba.
E historia den tur forma, pasobra historia ta dinamico, pero tin historia cu a tuma luga antes. Ta importante pa sa cu tur loke a tuma luga na Aruba. Ta un amistad cu a crea cu sr. Gerrit Wolter, kende ta esun cu a cumpra e submarino tur desarma y sr. George Davelaar for di Corsou, kende a arma esaki y treci Aruba y cu e intervencion di sr. Dufi Kock, pasobra nan conoce. Asina e entrega oficial a tuma luga na Archivo Nacional den persona di director Raymond Hernandes.
Esaki ta algo di felicita Archivo, cu a adkisicion aki.
