Ing. Marlon Croes, director di DOW, den conferencia di Gobierno a splica e procedura pa companianan di construccion cuminsa opera.
Prome cu Croes, Minister Andin Bikker a splica cu mundo di construccion ta un di e promenan pa cuminsa opera atrobe. El a enfatisa cu e companianan mester registra pa mira cu nan ta cumpli cu tur e rekisitonan di ley y e reactivacion mester bay stap pa stap. “No ta pa fastioso nos ta hacie di e forma aki, pero pa salvaguardia cu poco-poco nos economia ta reactiva pero cu siguridad. Y pa sigura cu nos hendenan local y esnan cu permiso ta bini na remarca prome.”
Croes a splica cu mester subi riba e website www.dow.aw cu ta manda e usuario pa e link unda por haya tur informacion riba e rekisitonan pa un compania di construccion por cuminsa haci su trabounan. Den e formulario ta pidi diferente tipo di informacion di e compania y mester registra solamente 25 trahado, pero 15 por traha hunto pero no riba otro. Tur lista ricibi ta bay tambe pa DIMP, AZV, SVb y DIMP pa control. Si e no ta cuadra, lo yama e doño pa inform’e cu ta hala su permiso di construccion aden.
For di siman pasa cu a habri e procedura di registracion, untotal di 395 compania a registra na DOW di cual 114 ta den control. DOW a haya nan mes obliga di hala aden permiso di construccion di 16 compania pa motibo di no ta cumpli cu tur e rekisitonan; a otorga 158 permiso; a rechasa 157 permiso y tin pending ainda 50 permiso pa firma.
Di tur e permisonan pidi, rond di 60% ta di construccion di cas, 20% di proyectonan comercial y e resto ta trabounan di mantencion (Airco, instalacion, corta yerba, etc.).
Conseho a bay na e companianan pa yena e formulario completo y cu nombernan corecto pa e fluho ta miho. Si falta informacion, e ta tarda pa otorga e permiso.
