Tin hende gusta pa ta den noticia ora nan ta viola e orario di cierre. Nan mes ta laga cliente keda te despues di ora di cierre den nan negoshi. No ta prome biaha cu polis ta bay na eynan. Diadomingo manece Dialuna, polis a pasa diferente bar, restaurant of nightclub pa asina percura pa tur ta cera 12:00 am manera gobierno a anuncia. Mayoria ta cumpli!
Nan ta cuminsa cende luznan 30 minuut prome cu 12:00 am pa por cobra e clientenan y percura pa prome cu e ora stipula, tur hende ta pafo y e negoshi ta cera. Tin di e negoshinan ta cuminsa e ritual ey fpr di 11:00 pm caba pa por ta sigur cu nan ta na ora pa cumpli cu reglanan vigente.
Ta bon pa accentua cu no ta asina cu 12:00 am bo ta purba stop e ambiente y djey bay cobra. Despues cu polis a pasa diferente localidad na Playa y tur a cumpli, a bay tambe den area di Tanki Leendert. Eynan pa 12:15 am a topa cu un BlueMoon Lounge carga di hende. Autonan di clientenan tabata para for di BlueMoon Lounge te cu un distancia di mas cu 100 meter.
Varios unidad di polis a bay pa asina atende cu e situacion y zorg pa tur hende sali for di BlueMoon Lounge. Mesun momento polis a bay pura atende un otro asistencia pafo di 809 Nightclub unda homber tabata batiendo un dama. Na yegada e cos a caba. Polis a bay bek na BlueMoon Lounge pasobra pafo e hendenan no kier bay cas. A bay pa core hende. Na yegada a topa cu basta hende riba caya.
Entrenan a topa hende bebi cu no a comporta nan mes den presencia policial. A bay over na detencion pa buracheria riba cayanan publico. Polis a detene un homber y un hende muhe. A busca transporte policial pa asina transporta ambos pa ward’i polis. Nan a bebe y gosa paden na Blue Moon y djey ora di bay cas ta sali hopi bebi y causa problema cu tur consecuencia.
