Inspeccion di Salud Aruba (IVA) a haya notificacion for di un importado di remedi cu tin un cierto produccion (batch/charge/lot) di e remedi Losartankalium, Valsartan y Irbesartan cu ta wordo saca for di mercado (recall) na boticanan na Aruba pa motibo di contaminacion cu e producto AZBT. Algun di e productonan aki tambe ta disponibel na Aruba.
IVA
Pa cu esaki, diabierna Inspectie Volksgezondheidsdienst a tene un encuentro cu prensa, pa asina trece mas informacion pa e pueblo di Aruba tocante e “recall” aki. Drs. Roselyn Angela, Inspector di Remedi a splica mas di e proceso di e “recall”, y ki ora ta haci un “recall”. Den e caso aki, e remedinan tabata tin cierto producto cu no ta traha segun e calidad di e fabrica. Ta haci testnan den laboratorio, y a bin detecta cierto “bijstof” cu ta surpasa limite. Den e caso aki, ta trata di e remedi Lozartan, Valsartan y Irbesartan.
E proceso ta cuminsa na momento cu e fabrica, cu tin e remedi registra, ta manda bisa cu e productonan mester sac’e for di mercado, y ta bay te na pashent. E productonan tin mas cu un importado, pero di un importado so e remedinan ta “recall”esaki. Pero tin otro importadonan cu tin e mesun remedinan aki, cual por yuda “supply” e pashentnan na Aruba. E importado ta drenta den contacto cu e boticario, cual na su turno ta drenta den contacto cu e pashent.
AVA
Adrienne Tromp, boticario na Botica di Servicio y miembro directiva di Apothers Vereniging Aruba (AVA) a indica di nan rol como botica den caso di un “recall”. Di biaha nan ta cuminsa yama nan pashentnan cu ta uzando un di e remedinan aki, pa pidi nan pashentnan pa trece nan bek pa botica. Un biaha mas, Tromp ta pidi e pashentnan aki cu pa kita tur duda, ta pa hiba nan remedi nan botica, pa esaki controla un biaha mas e “batchnummer”. Den caso cu e pashent aki su remedi ta cay den e batch cu ta den “recall”, botica na su turno, ta duna e pashent un otro remedi pa asina por controla nan presion.
HAVA
Dr. Joaquin van Trigt, presidente di Huisartsen Vereinging Aruba a splica cu nan tambe a ricibi informacion di e “recall” cu a surgi na Europa. Di biaha nan a tuma contacto cu Asociacion di Boticarionan, pa asina tuma contacto cu e pashentnan cu ta uza e remedinan aki. E remedinan aki ta yuda contra presion halto y cu problemanan di curason. Ta consehabel pa no stop di biaha cu e remedi aki.
Motibo pa cual a haci “recall” di e remedinan aki ta pasobra cu a detecta productonan cu ta causa cancer. Den caso cu e producto aki surpasa cierto limite, den e caso di e remedinan ya menciona, e tabata minimo. E producto detecta den e remedinan aki yama AZVT. Por ultimo van Trigt a pidi pa no drenta den panico, pero yama bo dokter di cas of bo botica. Si tin duda, yama bo dokter of botica pa tin mas claridad.Si tin pregunta di e remedi semper consulta cu bo dokter di cas y botica.
Inspeccion di Salud Aruba lo informa pueblo di cualkier cambio na su debido momento.
