E conocido ranchero di Dakota, Johnny Krosendijk a bay sosega. Awe diasabra a tuma luga un parada pa den un forma diferente despedi di dje. Semper por a topa cu Johnny den Playa cu su bais y cu su guitara riba lomba.
E tabatin hopi amigo, tur tabata aprecia su bos fenomenal con e tabata canta ranchera. E parada claro no por a keda sin su bicicleta. E tabata un adicto riba caya pero cu casi nunca polis a atende cu ne. Tabatin hopi hende cu tabata stim’e. E parada a pasa den diferente hanchi den Playa y tambe dilanti Yanti Restaurant, kende semper a percura p’e haya algo di come y bebe tur merdia.
E momento tabata un momento hopi special, tur hende a keda den sorpendi ora a mira e bicicleta. A reconoce dibiaha cu ta trata di despedida di e mucha homber cu tabata core riba bais y canta ranchera. Su ruman muhe durante un entrevista a conta cu Johnny a crea hopi amistad riba caya.
Johnny Krosendijk semper tabata presente den ceno familiar riba dianan special manera Pasco, Dia di Mama of ora un hende fayece. E ta canta na Misa ora di despedi di un miembro di famia. Semper e tabata canta cu Etty Toppenberg, pero awe, na momento di despedida, ta Etty a canta p’e. Di parti Headlines Group, e cas editorial di TREMPAN y 24ora.com ta manda palabra di profundo condolencia na famia, cu Johnny sosega na paz.
