Durante siman y weekend tras di lomba a inicia e curso pa maneho di cabrito y carne pa proposito comercial. Manera anuncia, cu interes a sigui halto pa e tipo di cursonan aki. Departamento di Agricultura, Cria y Pesca “Santa Rosa” a prepara pa e di dos curso y esaki a cuminsa.
Tabata diahuebs ultimo cu esaki tabata e prome curso di teoria aki na Santa Rosa for di 7’or pa 9’or di anochi. Sigui pa diasabra tras di lomba cu tabata e prome curso practico riba tereno di Santa Rosa. Aki a bishita e parti di criansa di cabrito y carne pa por duna un splicacion amplio door di e hefe di seccion di criansa den persona di Edward Berben. E curso practico ta entre 9’or pa 11’or di mainta.
Riba tereno di Santa Rosa mes ta mustra diferente posibilidad pa alimentonan pa bestia. Indicando kico por ta e matanan cu por planta pa alimenta bo bestia sin problema. Teniendo na cuenta tambe e parti nutritivo cu e matanan aki tin.
A bishita diferente cura di cabrito y carne pa e cursistanan por haya diferente splicacion riba e maneho optimal di criansa. Conoce na ki momento un cabrito of carne por ta malo y kico por ta e solucion. Conoce rasanan si nan ta puro of no. Na momento di rasa bo cabrito of carne kico bo mester tene cuenta cu ne.
Simannan cu nan ta “dik” con pa controla si tur cos ta bayendo bon. Cuido di lamchi pa bo por tin un ehemplar cu bon nutritivo y cuido adecua. E curso aki ta continua te cu dia 23 di september caminda na final tur cursista lo ricibi nan certificado di participacion. Di parti di Santa Rosa ta desea tur cursista hopi exito y cu nan por amplia mas nan conocimento riba criansa di cabrito y carne pa proposito comercial.
