Den un evento ameno na Centro di Husticia na Santa Cruz altocomisario di Polis Ramon Arnhem, a haci entrega di decreto gubernamental, hubilario y reconocimento na diferente agente cu a cumpli en total di 430 aña trahando, dedicando nan bida y nan tempo na Cuerpo Policial Aruba.
Altocomisario Arnhem a haci entrega di un plakkaat y reconocimento na agente policial Eddy Ras cu a cumpli 40 aña den servicio na Cuerpo Policial Aruba. Un trayectoria largo for di su inicio y t’e cu awe cu e ta forma parti di e organisacion. Un persona ehemplar, dedica y cu hopi experencia.
El a mira con e cuerpo tabata na momento di Korps Politie Nederlandse Antillen pa despues bira Korps Politie Aruba. El a cana hunto cu e organisacion for di inicio t’e cu awe. E ta un baluarte cu hopi di e coleganan grandi y chikito ta aprecia.
A haci entrega di 35 aña hubilario na polis Marlon Gumbs y 30 aña di hubilario na F. Yarzagaray cu ta personal administrativo di KPA.
Alabes a haci entrega na diesun agente cu a cumpli 25 aña den servicio na Cuerpo Policial Aruba; R. Maduro, E. Maduro, E. Kelly, M. Pieters, R. Kock, A. Kelly, G. Dania, J. Oduber, A. Zievinger, A. Geerman, M. Arrindell, N. Tromp y J. Rosel.
Tambe un grupo grandi di polis a ricibi nan promocion pa asina ricibi nan rango nobo den Cuerpo Policial Aruba. Ta trata aki di e agentenan;
A. Jansen, ta ricibi su promocion pa brigadier eerste klasse.
Di brigadier eerste klasse pa Hoofdagent: I. Puriel, D. Tromp, J. Arends.
Den e grupo aki tambe tin agente policial, cu no solamente a haya promocion, pero tambe a sigui un curso mas avansa di trafico. Esaki den cuadro cu e agentenan aki, ta den departamento di trafico y a participa na un curso di “At-scene traffic crash/traffic homicide investigation online-accelerated”.
Nan a haya e curso aki di “Institute of Police Technology and Management di University of North Florida”. Ta trata aki di agentenan; A. Solarte Tovar, G. Kock y D. Wever cu awor ta mas specialisa den nan area.
Un grupo di polis tambe a haya promocion y ta bira sub-inspector di Polis, ta trata aki di; A. Winklaar, G. Koolman, M. Cabral, J. de Cuba y E. Pieternella.
Masha pabien na e grupo grandi di polis cu a haya reconocimento y decreto gubernamental. Alabes masha pabien na e hubilarionan cu a yega 40 y 35 aña den servicio di Cuerpo Policial Aruba. Sigur boso famia tambe mester ta orguyoso di boso, cu e bunita trayectoria largo den e organisacion policial. Masha pabien!
