Durante discurso di mr. Mauritsz de Kort, presidente di Corte Comun di Husticia diahuebs atardi den cuadro cu instalacion di hues y PG nobo, de Kort a pone enfasis riba varios reto pa atende aki na Aruba.
El a subraya cu compara cu otro islanan, akinan na Aruba tin hopi di loke nan ta yama ‘Bevel tot Betaling’ unda cu creditornan, dus hendenan cu ta fia placa ta pidi corte duna ordo na esnan cu a fia e cen paga. Compara cu e otro islanan, Aruba tin masha hopi mes, segun de Kort.
“Esey ta mustra riba e problema di debe. Dus cu hopi hende akinan na Aruba no ta gana suficiente of no sa con pa atende cu nan cen, of e ta bisa tambe cu e prijs ta hopi halto anto cu nan tin cu fia pa fia. Mas peticion ta drenta e ora ey cu nan no por paga.”
UN PROBLEMA MAS GRANDI
Esaki ta señala un problema mas grandi den nos comunidad cu simplemente e cantidad di casonan cu nos ta haya, segun de Kort.
E parti social a bini hopi dilanti durante e instalacion di huesnan y PG nobo. Tabata algo cu a keda subraya den tur discurso e atardi aki. “Mi ta hopi contento cu tanto di parti di Ministerio Publico pa nos PG nobo, den loke cu Decaan Orden Van Advocaten a trece dilanti, tambe combersacionnan cu m’a hiba cu miembro di directiva di organisacion di scol. Caminda cu e preocupacion cu e PG tambe a trece dilanti pa nos hubentud ta ta enorme.”
