Ta for di aña 2018 a nombra Kevin Peterson, un polis di riba 30 aña di experiencia, den e funcion di director di Bureau City Inspector. Pero, el a yega na su edad di pensioen y mester bandona e puesto. Conseho di Minister a aproba un contract di 6 luna mas mientras cu e mester “werk in” ex-polis Roy Lacle pa dicho funcion.
Esaki ta di dos intento cu partido MEP lo haci pa acomoda Roy Lacle den un funcion di director di un departamento di gobierno. Por corda cu su salida for di Cuerpo Policial Aruba no tabata cu honor, loke a pone tambe cu nunca mas a tum’e eynan, pa cual el a keda pa hopi aña na cas ta cobra sin traha.
Tabata na momento cu Rudy Croes tabata bahando como minister di husticia na aña 2009, cu el a core nombra Roy Lacle den e funcion di director di Guarda nos Costa. Probablemente e minister mester por tabata sa cu Lacle dificilmente lo pasa e “veiligheidsonderzoek” pa e por ocupa un funcion di director den gobierno. Pero asina mes a pusha e nombracion cu consecuencia cu el a sali negativo y nunca e por a ocupa dicho puesto.
Minister Arthur Dowers a hereda e problema pasobra mester a mand’e bek pa Cuerpo Policial Aruba pero nan a nenga di tum’e. Asina el a keda como 8 aña cas den “overtolligheisdpoel” y sin traha pero cobra si. Na entrada di Gabinete Wever-Croes, el a haya e puesto di hefe di siguridad di Cocolishi. Pero atrobe, na final di e periodo di gobernacion, ta haci un di dos intento pa acomod’e na un puesto ehecutivo. E biaha aki na Bureau City Inspector, cu entretanto a kita for di ministerio di infrastructura y medio ambiente, pa bay resorta awo bou di ministerio di husticia.
E trahadonan di BCI entretanto a tende caba di e nombracion den Conseho di Minister y ta pendiente pa yegada di nan hefe nobo. Por spera mas di e nombracionnan aki den e simannan nos dilanti, debi na e periodo di gobernacion ta yegando su final y campaña a cuminsa.
Coordinadornan cu ta nota cu tin chens cu e gabinete lo no regresa den un di dos periodo, ta cuminsa forsa pa Conseho di Minister pasa nan nombracion den pura, cu speransa cu departamento di recurso humano (DRH) lo proces’e ainda na tempo pa Gobernador firma prome cu eleccion. Pero por corda cu na entrada di e gobierno aki, e mesun conseho di minister aki a para tur nombracion cu e gobierno anterior a haci.
Pues, hopi di esunnan cu haya un nombracion awo, den pito di eleccion, por spera problema sea cu e gobierno nobo of cu COHO, cu lo considera esakinan como nombracionnan politico den cuadro di e “afscheidbeleid” di Gabinete Wever-Croes.
