Maybellene de Cuba a perde guera contra Covid-19

Awe merdia a drenta e noticia tristo cu un otro pashent den e unidad di cuido intensivo na hospital a fayece, debi na Covid-19. Ta trata aki di Maybellene de Cuba di 65 aña di edad. E tabatin algun dia caba luchando cu su salud, pero awe e virus a gana e guera.
Cu e morto di Maybellene de Cuba, nos isla ta conoce e di 69 caso fatal debi na e virus aki cu a yega Aruba ofiicalmente dia 13 di maart 2020.

Desde e dia ey nos isla no ta mesun cos mas y separa di aplica varios medida di precaucion pa rasonnan di salud, tambe e consecuencia economico ta resultado devastado pa varios area di comercio.

Scolnan a cay atras cu nan lesnan y mas peligroso ainda, nos sector di salud ta totalmente dedica na pashentnan di Covid, cu consecuencia cu no tin suficiente tempo ni man pa atende otro enfermedadnan.

Diamars awo e prome lote di vacuna ta yega Aruba, cu ta brinda nos isla speransa cu cosnan por cambia. E intencion ta pa vacuna mas tanto hende posibel pa nos ta miho prepara, pa preveni mas ola di e virus y pa e contagio por baha na un nivel aceptabel. Awor aki Aruba ta e isla cu mas contagio y mas caso activo den Caribe Hulandes, cu ta pone un presion enorme riba nos sector di cuido.

E ultimo siman aki nos isla a conoce varios caso di morto, debi na Covid-19. Mayoria tabata adulto di un edad ya respeta caba. Asina mes, e dolor no ta menos pa e famia cu ta keda atras. Na famia de Cuba, nos ta expresa palabranan di condolencia y hopi forsa den e momentonan dificil aki.