Diahuebs y diabierna ultimo tabata un dia grandi na Scol di Polis E.Y. “Watty” Vos na San Nicolas, ora a tene un ceremonia special y diferente e aña aki pa motibo di reglanan di COVID-19. Den forma di un “Drive By” a entrega diploma no menos di 46 studiante pa polis.
E polisnan a ricibi nan diploma for di man di Ministro di Husticia y den presencia di altocomisario suplente Irma Gordon y hefe di scol di Polis E.Y. Watty Vos, Jeannette Richardson-Baars. Mester menciona cu 30 studiante a termina nan estudio policial y awor tin nan diploma MBO nivel 4 den nan man.
Ta trata aki di klas 2017-1: M. Westerhof, B. Croes, D. Kock, M. Angela, M. Tromp, R. Rosel, K. Janga, J. Boekhoudt, W. Connor, E. Luidens, A. Henriquez, K. Simileer, T. Maduro, V. Nuñez y D. Quant. Y di klas 2017-2 tabata: A. Pirela Soto, J. Kraag, E. Tromp, M. Croes, D. Franken, G. Martinez, D. de Castro, G. Nicolaas, S. Jansen, T. In’t veld, A. Morillo Rojas, N. Sanches Salas, E. Tromp, C. Garcia Melo, D. Alvarez Espinal y H. Nuñez Bahamon.
Cu e trayectoria di estudio tras di lomba, Aruba awor tin 30 agente policial studia y prepara pa mantene ordo y siguridad den comunidad. Na mesun momento klas 2019 tambe a ricibi nan diploma di MBO nivel 3. Cu esaki den man, nan ta na mita caminda di nan estudio policial. E klas ta consisti di 16 studiante: J. Ruiz, M. Violenes, N. Mongen, D. Fernandes Peña, L. Lopez Pineda, C. Rodgers, M. Voz, M. Montero, J. Tromp, P. Maduro, C. de Cuba, A. Villamizar, K. Kock, M. Martillia y R. Ras.
“Nos ta hopi contento un biaha mas pa entrega un otro klas pa traha hunto cu nos den Cuerpo Policial”, asina altoinspector Jeannette Richardson-Baars a comenta despues di un periodo intensivo cu e studiantenan aki. Pa e hobennan cu kier bira polis, keda pendiente pasobra Cuerpo Policial Aruba ta cla pa cuminsa cu klas 2022. Dia 1 di october 2021 lo habri solicitud atrobe. Keda pendiente riba e paginanan oficial di polis.
Altocomisario suplente di Cuerpo Policial Aruba, Irma Gordon, ta hopi contento y orguyoso di haya sanger nobo cla pa sirbi comunidad. Aki par di tempo polisnan di edad lo baha cu pensioen y lo mester di e hobennan pa reemplasa y carga e organisacion.
Un mensahe di Irma Gordon pa e hobennan cu kier solicita pa bira polis ta pa nan sigui solicita, prepara bo mes bon pa asina por pasa tur e testnan pa por drenta e academia. Pa e studiantenan cu a caba nan estudio policial “Mi ta desea boso hopi suerte den boso trabou, sea semper bo mes, duna respet pa bo wordo respeta y keda bo mes, bo lo yega hopi leu.”
