Debi na e Shelter in Place, e eventonan riba Dia di Rey lamentablemente no por a tuma luga manera ta custumbra na Aruba. Aki ta pensa riba eventonan musical, cultural, deportivo y tambe e mercado libre unda ciudadanonan ta bende diferente articulo cu nan mes a traha y ta bende esakinan na un prijs rasonabel riba e dia aki.
Famia Werleman di Kas Ariba 13-B, kendenan ta conoci pa nan garage sale di tur luna, a dicidi di duna e oportunidad pa esnan na cas toch por disfruta un tiki di e dia aki. Ta asina cu yiu di Rodney Werleman a expresa su deseo pa regala algun cos na esnan cu lo ta interesa. A dicidi di pone un aviso chikito riba facebook, unda a laga sa cu na dicho adres por pasa y piki cualkier cos manera DVD di diferente pelicula, weganan pa mucha y algun paña. Tur cos tabata completamente gratis.
E aviso riba Facebook a capta atencion y den un rato di ora varios persona a pasa na Kas Ariba y a coy algun cos p’asina tene e muchanan na cas contento cu weganan y/of DVD di pelicula pa pasa e Shelter in Place na un manera estilo di “Home Cinema”.
Hopi hende ta haya e iniciativa aki di famia Werleman uno bunita. Kisas esaki por ta un inspiracion pa mas famia na Aruba comparti algo cu e comunidad.