Bright Bakery ta sumamente contento cu e cooperacion cu Comision Derecho di Mucha Aruba. Bright Bakery como compania local ta haci su esfuerso pa yuda pueblo di Aruba principalmente nos muchanan, unda por.
E saconan di kipashi blanco y kipashi bruin di Bright Bakery ta drenta den mas cu mita di e hogarnan na Aruba y por medio di un edicion special di e saconan dedica na derechonan di mucha, Bright Bakery kier informa e pueblo y specialmente e muchanan di Aruba di nan derechonan. Riba e saconan di pan edicion special, bo por lesa e prome 9 di e 54 articulonan di e tratado Internacional di Derecho di Mucha. Riba e website www.derechodimucha.org por lesa tur 54 articulonan for di e tratado Internacional di Derecho di Mucha.
Competencia
Bright Bakery ta lansa pa luna di november un competencia di “Obra Creativo” entre e scolnan basico na Aruba, uzando e saconan di pan di Bright Bakery su edicion special.
Criterionan di participacion:
- E mester ta un obra creativo traha di material recicla di cual 50% mester ta consisti di e saco di pan di Bright Bakery su edicion special cu e diseño di Derechonan di Mucha.
- Otro materialnan cu por wordo uza ta container di plastic of no plastic, papel, carton etc etc.
- Ta permiti pa entrega solamente 1 obra pa cada scol basico.
- E tamaño di e obra mester ta entre 60 cm di haltura y 60 cm di hancho.
- E obra mester refleha 1 di e 54 articulonan for di e tratado Internacional di Derecho di Mucha (pa mas informacion di e articulonan bishita www.derechodimucha.org)
- E obra mester ta acompaña cu un descripcion/storia.
- E obra mester tin skirbi e nomber di e scol y e derecho (number di articulo) cu e ta representa.
- Mester ‘like’ e pagina di Facebook di Derecho di Mucha y ‘like’ e obra di bo scol.
Registracion: Pa registra mester manda un mail na [email protected] cu e siguiente informacionnan:
- Nomber di scol
- Nomber di persona di contacto
- Number di telefon/celular
- E-mail adres
- Cantidad di alumno na scol
Tuma nota cu e ultimo dia pa registra ta diahuebs 7 di november 2019. Entrega di obra:
Ultimo dia pa entrega e obra creativo ta dialuna 2 di december 2019, 2:00 pm na Bright Bakery Piedra Plat.
Obra ganado:
- E comision di hurado lo consisti di un persona di Bright Bakery, un persona di Comision Nacional Derecho di Mucha, un persona di Muchila Creativo y un mucha.
- Evaluacion ta wordo basa riba 50% of mas di e obra traha cu e edicion special di saco di pan di Bright Bakery, 30% creatividad, 10% ta descripcion/storia tras di e obra creativo y 10% di popularidad riba social media.
- Lo anuncia e ganado riba 6 di december 2019 na Bright Bakery.
Premio:
Bright Bakery lo percura pa tur alumno y maestro di e scol ganado, bay wak hunto como scol un pelicula na The Movies Aruba. Tur obra di creativo cu ta parti di e competencia lo wordo exponi na Bright Bakery Piedra Plat pa henter e pueblo di Aruba pasa admira. Bright Bakery ta hopi contento cu e proyecto positivo aki y kier gradici pueblo di Aruba pa e confiansa un biaha mas.
Pa mas informacion por tuma contacto cu sra. Stephanie Nucete na telefon 585-9031.