Diabierna den oranan di mainta contratistanan a cuminsa cu trabou cu mester haci na un parti di Colegio San Hose na Sta Cruz.
Den combersacion cu e docente Joanne Angela Croes, el a splica cu esaki ta un trabou cu tabata pendiente pa tuma luga. Prome cu final di aña escolar tras di lomba, e scol a haya notificacion cu awo si ta bay basha’bou e edificio patras na Colegio San Hose.
Klasnan 1, 2 y 3 tabata ubica den e edificio ey cu algun tempo atras a wordo “afgekeurd” pa expertonan di DOW. E motibo ta cu e murayanan ta hopi poros (mal estado y debil). Ya caba tur material a wordo poni den container. Asina cu tur e trailernan (moderno) full cu airco ta cla, riba tereno di Colegio San Hose, ta cuminsa yena esakinan cu banki, stul y tur e materialnan necesario. Segun Juffrouw Joanne Angela Croes, e tereno di e scol ta hopi amplio y por acomoda e baraknan moderno cu airco pa e muchanan di klasnan 1, 2 y 3. Esaki ta nifica cu pa e aña escolar nobo, e muchanan lo ta bon acomoda.
E plan ta pa cuminsa cu construccion di e edificio nobo di biaha. Di tur manera, nan ta spera cu esaki ta cla pa estrena espacio nobo den e aña escolar 2020 / 2021.