Diahuebs mainta Corte a trata e caso penal contra e homber Fernando Martinez, acusa di asesinato di e homber Chini Tse Mora riba 12 di november 2017, den bisindario di OK Supermarket na Tanki Leendert.
Un simpel problema den trafico, a pone cu e Colombiano Fernando, kende tabata basta bou influencia di alcohol, a perde cabes. El a bay tras di e vehiculo den cual e victima tabata, a cera nan cu su auto pa obliga nan para. E acusado a baha bay direccion di e chauffeur y a cuminsa reclam’e y tambe e otronan cu tabata den e auto.
Declaracion di e e diferente testigonan, tanto di esnan den auto di e victima como e trio cu e acusado a duna lift, a bisa cu e homber aki (Fernando) tabata hopi agresivo. Di otro banda e otronan tabata basta trankil y a hasta a puntr’e “Amigo pero que pasa”. Pero su actitud a causa cu un di nan a da’le un cantiman pa mira si esey ta pone bin bij. Pero esaki a empeora e situacion.
Esnan cu el a duna lift, a bisa cu nan a mira Fernando bay su auto coy algo, pero no a mira momento cu e agresion a tuma luga pasobra nan a dicidi di bay for di e sitio. Si tabatin cu a scuch’e bisa, y tambe e amigonan di e victima, cu “este golpe sa paga con la muerte”.
E chauffeur di e otro auto y e dos damanan cu tabata compañanan a mira e homber yega cu un obheto den su man y esaki el a claba cu forsa den pecho di Mora, cu a pon’e cay di biaha na suela. El a bira pa bay riba e siguiente victima, esta e chauffeur mes, y a logra hinke un biaha na altura di su schouder y ora cu e homber a cay na suela, Fernando a bay bek na su vehiculo, subi y a bandona e sitio.
E mes den su declaracion a bisa cu e no ta corda nada di e hincamento, si cu el a bay para e otro auto pasobra nan ta core malo den trafico. Despues di e golpi e no ta corda nada te ora cu el a lanta na su cas. E ta bisa cu esaki ta debi cu el a haya un sla na cabes den un accidente anterior. Pero psikiatra ta bisa cu esaki por ta dor di e consumo excesivo di alcohol e anochi ey. Pero esaki no ta kita cu e ta responsabel pa su actonan.
Pa e motibo ey tambe Ministerio Publico a pidi un castigo di 15 aña. Aki tres siman lo tin sentencia.
