Durante di firmamento di e acuerdo bilateral entre Reino Hulandes y Venezuela, Vice Presidente di Venezuela Tareck Zaidan El Aissami Maddah a anuncia e nombramento di e general en hefe, Carlos Mata Figueroa como Consul nobo na Aruba. Aunke cu ya for di Februari e noticia aki ta conoci, ta durante di e reunion di alto nivel entre e dos paisnan cu e mandatario a anuncia esaki.
Durante e anuncio e Vice Presidente a expresa cu e ta spera di parti di Reino Hulandes, cu ta forma parti di e acuerdo di cooperacion, pa sigui avansa den e consolidacion di e relacion di trabao entre e paisnan bisiña, esta e islanan ABC.
E nombramento di Mata Figueroa, segun cu por a lesa den e Gaceta Oficial di Venezuela, a drenta na vigor desde dia 16 di Februari, ta nombra dor di Presidente Maduro como “Protector” di e estado di Nueva Esparta, despues di a perde den e eleccionnan regional pa e gobernacion di e estado aki. No obstante, Dante Rivas a reemplasa Mata Figueroa na e cargo aki desde dia 15 di Februari.
E decision a bin despues cu e Presidente di e Republica, Nicolas maduro, a ordena diabierna, dia 5 di Januari, e ciere di e via aereo y maritimo cu e islanan ABC.
Awo, despues di e firmamento di consolidacion cu Hulanda, por bisa cu esakinan ta habri, pero, te ki dia, ta keda e pregunta.
Ken ta Carlos Mata Figueroa
Carlos Jose Mata Figueroa (Pedregales, Nueva Esparta, Venezuela, naci dia 30 di October 1957), miho conoci como Mata Figueroa, ta un politico y militar Venezolano. E tabata minister di Defensa di Venezuela desde Juni di 2010 te cu Juni 2012, unda el a keda sucedi pa Henry Rangel Silva. Mata Figueroa a logra e Grado di General en Hefe den e ehercito nacional di Venezuela. E tabata gobernador di e estado Nueva Esparta den e periodo 2012–2017. Y awo, a nombr‘e como Consul General di Venezuela na Aruba.
