Trahadonan di Migracion a pidi cabes di Gerald Vingal

3409
RBC Mortage
Aduana
CMB Biba 100

E director di Migracion Aruba, Gerald Vingal, ta hayando bastante contratiempo den maneho diario di e departamento. Ya na inicio di e gobierno aki a puntre for di Ministerio di Husticia si e kier bay otro departamento pasobra nan kier su stoel. E Minister a hasta papia cu un ex-Inspector di Polis pa tuma e funcion, pero el a nenga. Awor ta asina leu cu e trahadonan mes a vota den mayoria, dilanti Minister Andin Bikker, pidiendo pa kita Vingal for di Migracion y mande pa un otro departamento. E motibo: El a duna un mal evaluacion na un grupo di empleado cu ta constantemente cu AO.
Tres sindicato den Migracion
Migracion Aruba ta conta cu representacion sindical di 3 diferente sindicato, esta STA (Esun mas grandi), SEPPA y TOPA. E sindicatonan a informa Gobierno di masha siman atras caba di e situacion reinante, pero no a logra haya Minister Andin Bikker pa duna e atencion necesario na e problema. E situacion a escala di tal forma cu ayeranochi a yama un reunion urgente pa 7:00pm na Centro di Bario Tanki Leendert, unda STA a invita Minister Bikker pa tambe ta presente.
Reunion entre empleadonan y Minister
Ey e trahadonan a desahoga nan preocupacionnan y critica pa e forma con ta atendiendo cu nan. E problema cardinal, segun e empleadonan, ta e director Gerald Vingal. Su forma di liderazgo ta cuestionabel den bista di e trahadonan y di sindicato STA, kende tambe tabata presente den reunion entre empleadonan y Minister di Husticia.
Kico ta e problema?
E discusion mas grandi ta cu tin un grupo di aña 2005 cu lo no haya nan “bevordering” manera debe ser, cu 3 aña di “terugwerkende kracht”. Nan ta critica cu e ploeg di aña 2009 si a cla caba, a haya Landsbesluit caba y nan nada. Tambe cu den e ploeg di aña 2009 tin un empleado cu a cay cera y siendo encarcela a regla su “bevordering” pe. Tambe a bisa Minister cu e klas di aña 2009 no a ni huramenta y ni tin Landsbesluit ainda. Nan a pidi Minister pa regla e discrepancia aki, pa evita un welga den Migracion.
Minister Andin Bikker a pidi tempo
E mandatario, cu na October ultimo a tuma mando over di husticia a splica e grupo di empleadonan cu e no ta na altura di e caso specifico aki y cu e lo pidi e director Gerald Vingal pa mande e dossier pa e mira kico tin di berdad den e keho di e empleadonan. El a haci un suplica riba e trahadonan pa keda calmo y cumpli cu nan trabou mientras cu e lo mira kico por haci. Si el a splica cu ta imposibel atende cu cada Landsbesluit awo, pasobra nan no a ni sali mes ainda. El a conseha e trahadonan pa laga e decretonan sali y si nan no ta di acuerdo, pa e ora ey nan emiti un “bezwaar” pa un reevaluacion. Tin di e trahadonan a expresa di tin hopi rabia y cu lo agredi e director, riba cual e Minister a atende nan cu esey si lo hinca nan den hopi problema cu nan trabou!
Sindicato STA ta condena actitud di Vingal
Diego de Cuba a bisa nos awetardi cu pa algun tempo caba tin tension den e departamento aki. E trahadonan ta reclama cu e director a evalua nan sin papia cu nan mes y a manda nan evaluacion (beoordeling) aden na Minister sin a scucha e trahadonan mes prome. Tambe ta sinti un discrepancia den con ta evalua e trahadonan pasobra algun cu ta keda cas hopi cu AO si a haya bon evaluacion y otronan no. STA ta spera cu Minister Andin Bikker por pone atencion na e asunto aki pronto pa evita escalacion y problema na pia di trabou.
Politica den Migracion
For di empleadonan den Migracion Aruba nos a compronde cu politica a infiltra den e departamento aki. Un grupo ta sostene e partido POR y e otro grupo ta fiel na MEP. E dos gruponan ey awor ta confrontando otro pasobra esunnan afilia na MEP lo a prefera pa Rocco Tjon a bira Minister mientras cu esunnan cu POR ta super contento cu nan tin e Minister di Husticia. Ta sinti cu ta e dos gruponan aki awor tin problema cu otro.
E otro banda di medaya
Mester menciona cu e asunto di evaluacion y cu un grupo a cla prome cu e otro, no necesariamente ta cuadra cu berdad. Hecho ta cu tur a keda cla, pero e klas di aña 2005 a haya “straf”. Nan tin un averahe di mas o menos 1 ziektemelding pa siman! Di e 14 empleadonan den e ploeg, 2 so a haya un bon evaluacion y lo haya nan promocion manera mester ta. E demas 12 empleadonan no ta cualifica pa un promocion, por lo menos no manera e otronan. Directiva di Migracion no ta kere cu mester premia esunnan cu ta dal AO constant, pasobra sino pakico ta evalua e trahadonan anto? Ki mensahe lo manda pa esunnan cu si ta haci nan best y ta traha tur dia bay sin dal AO?

Proceso di algun luna caba
E proceso aki no a cuminsa di awo, sino di lunanan pasa, den tempo di Gabinete Mike Eman II. Ex Minister Dowers a cuminsa e proceso cu awor Minister Bikker mester finalisa. E proceso a inclui evaluacion di cada empleado cu nan hefe directo, cu a firma tur e evaluacion di tur empleado, a manda nan pa Departamento di Recurso Humano (DRH) pa reevaluacion y pa hinca den sistema. Awor cu e proceso a finalisa, algun di e empleadonan lo kier canalisa e asunto via politica pa mira si por cambia e evaluacion pa toch logra nan promocion, aunke tin keho riba nan prestacion.
Tendencia di “Bula nan cabes”
Den pasado, bou Gabinete Oduber, e tendencia di kita hefenan di departamentonan di Gobierno a bira popular. E mesun Andin Bikker, e tempo ey cu PDR, a propaganda e tendencia aki contra MEP den campaña di aña 2005. Pero ta nota cu e ultimo lunanan atrobe e tendencia aki ta lanta cabes. No ta sigur si e tin di haber cu politica of cu sindicalismo, pero a pidi cabes di e Director di NV Elmar, di ASTEC, di METEO y awo di MIGRACION. Pa casualidad e sindicato STA ta envolvi den tur e departamentonan of companianan aki. Por corda cu algun tempo atras sindicato SPA tambe a pidi cabes di Dolfi Richardson, te cu despues mayoria Polis a core cu e directiva di SPA por completo tambe.
Minister Andin Bikker no kier duna comentario
Na e reunion nos a acerca Minister Andin Bikker pa su comentario, pero el a keda masha sorprendi cu prensa tambe tabata invita na e reunion. El a bisa di no kier duna comentario ainda pasobra e mester evalua e asunto aki di cerca prome. Ta obvio cu e mandatario ta confrontando bastante reto den su departamentonan, specialmente den Cuerpo Policial Aruba unda tambe tin division pa motibo di politica y sindicato, y awor tambe den Migracion Aruba.
Migracion Aruba ta un departamento nobo
Entrante dia 1 di september 2017, oficialmente Instituto Alarma y Siguridad Aruba (IASA), funda tempo di Minister Rudy Croes, a stop di existi. Na su luga a funda Migracion Aruba, cu Gerald Vingal na cabes. E departamento aki ta atende tur asunto di migracion na aeropuerto y wafnan, mientras cu Warda nos Costa a pasa tambe bou di nan.
Tocante Migracion Aruba
KFC Variety Pack
Pre-Owned Sales Event at Yrausquin
Vacatura Parts
Rockstar Energy Drink Campaign

A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion.

Aunke cu e intencion inicial tabata pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa, toch no a logra keda cla te awor dia 1 di september cu e cambio ta drenta na vigor.

Servicio di Inmigracion ta consisti di mas o menos 60 empleado mientras cu Warda nos Costa ta conta cu mas o menos 17 empleado.

Comments

comments

Dragon Fly
Score cu Gillette
Test Drive Garage