Mirando e fenomeno di shopmento online a mira un crecemento enorme durante e ultimo añanan, no ta descarta cu e pakinan no lo wordo controla. Segun Katherine Lacle, di Post Aruba NV, ora cu e pakinan yega Post, tin cu haci e proceso cu Douane tambe. Nan tin cu pone e tarifa segun e tipo di articulo y ora cu tin tur e sumanan ey, ora cu nan tin e calculacion eynan, cu ta haci e cobransa cu nan shipping fee y costo di Douane tambe ta bin acerca.
Douane
Na Post Aruba NV Douane tey presente. Nan ta haci uzo di ASICUDA. Nan tin Douane tambe inhouse pa controla e pakinan.
Temporada di fin di aña
E temporada di mas druk ta November y December. Temporada cu tin Thanksgiving, Blackfriday y Cybermonday, caminda cu tin e ofertanan online mas grandi. Hopi hende ta probecha pa haci compras durante e temporada aki. Tambe pa December, como cu ta duna regalo di pasco. Hendenan ta probecha pa haci nan compranan online. Actualmente tin hopi hende ainda cu no por tabata durf di shop online, pero no sa con pa haci’e. Post ta trahando un video y den nan proximo edicion di nan revista “Bo Cartero,” nan lo pone paso pa paso con pa shop online pa esnan cu no sa ainda con e proceso ta bay of no ta durf di haci esaki ainda, pa duna nan mas informacion pa nan sinti mas comodo y nan tin e pasonan pa nan por haci e proceso mas facil.
Na tempo
Lacle a splica cu nan ta bay haciendo cambio pa miho, pa asina kita e parti di operation pa bay un otro luga, unda cu nan ta haya servicio di Douane pa e pakinan sali mas lihe.
Servicio
Hopi hende ta busca paki y kier hay’e mas lihe posibel. Tur cos ta depende si manda e documentonan concerni, esta e invoice pa nan hay’e pa key in e code den sistema. Manera cu hink’e den sistema ta haya aprobacion di ASICUDA, e paki ta wordo laga liber y despues manda e informacion pa cliente.
Mas lihe nan ricibi e facturanan, mas lihe e pakinan por wordo procesa. Ora cu nan yega, tin cu hink’e den e sistema. Tin biaha tin paki cu ta haya luz berde, luz geel of luz cora. Esaki ta nifica cu e pakinan cu ta haya luz di color geel y cora, mester wordo mira mas den detaye door di Douane. Esaki ta random. Cualkier paki por haya e diferente luznan aki. Si bo a haya berde, bo tin chens cu e ta sali mas lihe. Pero si e haya un otro color, e por tuma un tiki mas tempo. Ta den planning tambe pa muda pa aerocargo, pa asina nan tin e pakinan eynan, ora cu nan ricibi nan y cu e proceso por cana un tiki mas lihe. Sa cu tin temporadanan cu ta druk, cu por ta cu e volumen ta bin asina grandi cu e ta keda un tiki pisa pa nan por wordo procesa den e rapides cu ta desea. Post ta haciendo su best pa por mehora e proceso y pa duna un servicio di mas calidad.
Pakinan di exportacion
Tin un campaña special cu ta tarifa special pa studiante, unda cu Post ta brinda pa diferente pais unda cu mayoria di studiante ta bay, manera Hulanda, Merca, Costa Rica, Colombia. Ta haya volumennan hopi halto den e temporada aki pa esnan cu ta bay biba afo. Nan ta manda nan articulonan, como cu den maleta tin un limite den peso y nan ta probecha hopi di e tarifa aki. Den December tambe tin un special rate pa diferente pais, caminda cu e personanan por probecha pa manda regalo pa nan sernan kero cu ta den exterior. Tambe nan tin nan servicionan regular di paki, nan tin express mail service, cu ta e servicio mas lihe cu nan tin na nivel internacional di Post Aruba, cual ta wordo hopi uza pa hendenan particular. Sa cu tin companianan cu tin bentanan internacional, cu ta haci uzo di servicio di Post Aruba pa exporta den mercancia pa cumpradonan den exterior.
Entrenamento
E union postal universal ta bezig cu proyectonan regional. Tur region di mundo ta bezig cu training, tayernan manera Operational readyness for Ecommerce. Door cu cartanan ta bezig ta drop tur caminda, esaki ta nan oportunidad pa uza tecnologia pa comercio electronico. Nan ta bezig ta preparando tur pais pa nan operation ta mas eficiente posibel, pa nan ta prepara pa e comercio electronico, pa por haci esaki algo grandi.
Prome cu cuminsa brinda e servicio masivamente na tur compania, Post Aruba kier ta bon prepara internamente pa por deal cu esaki. Mester tin sistemanan digital in place, nan operations mester ta eficiente, mester tin rutanan di aerolineanan bon defini, bon palabracion cu Douane pa tur e proceso eynan por bay smooth.
Merca
No ta di Merca so hende ta shop, sino tambe di China y otro paisnan. Nan ta uza post su adres di Miami. Si nan ta shopi di China, nan ta uza nan adres na Miami. E mercancia ta yega Miami y post ta trece Aruba. No ta limita na Merca so. Ta full rond di mundo cu ta ship pa e adres na Miami, y Pos ta trece e pakinan.
